Daily Newspaper

Roland-in Mamoia Colney an drum tilar turin an thlang

24

Khawvel huapa music instrument siamtu hriathlawh Roland chuan Mizo drummer Mamoia Colney chu an drum tilar turin an thlang a, an drums model thar Roland TD
17KV an rawn pe a, contract hi kum khat atan an duang phawt a ni.

The Prophets drummer Mamoia chuan, “Roland company-in drummer endorse tur an zawng a, min rawn thlang ve hlauh mai a, contract kum khat atan an ti a, anmahni
lam chuan an tifel tawh a, keimahni lamin kan la sign lo a, kan tifel thuai ang,” a ti.

March thla a inbe tawh kha an ni a, mahse, COVID-19 hripui leng avanga lockdown-in a nan zui tak avangin a drums thar tur pawh a rawn thleng thei lawk lo va, tunah
lockdown te thlahdul a nih takah chuan a drums thar hi a rawn thleng tawh nghe nghe a ni.

Mamoia chuan, “Ka la awih lo hial zawk a ni,” a ti a, a drums dawn chu Rs 1,78,000 man vel a ni a, an thawnna nen chuan Rs 2,00,000 vel chu company lam hian an
sengin a rinawm a, “Mahni suma lei tur ni se kan lei phak loh tur a ni a, a lawmawm khawp mai,” a ti.

Roland TD 17KV hi electronic drums-ah pawh a changtlung ber pawl a ni a, amah hian recording a tih nghal theih a, bluetooth hmangin smartphone nena thlunzawm
theih a ni a, laptop nena inchhawp leh hranpa ngai tawh loin engkim a tih theih tawh a, memory card emaw pendrive emaw a support bawk a, music track siam thin ten
software an hmang ang te pawh a thun ve leh vek theih bawk. Hei bakah hian a siam dan phungah pawh hmanraw tha leh changkang zawk hman a ni.

Mamoia hi naupan lai atanga drums vuak tui tawh a ni a, kum 8 mi vel a nih atanga vaw tan tawh a ni a, “Serious deuh hleka ka kal tanna chu pawl 12 ka zirlai vel a ni,” a
ti a, eizawn nana drums a vuak pawh kum 10 chuang a ni tawh a, Mizoram chhung leh pawnah best drummer tum 5 a lo ni tawh nghe nghe a ni.

The Prophets bakah side band pahnih Zoramchhani Band leh Sound From the Hills-ah te a tel a, Mizo drummer kan neih te zinga hriat hlawh ber pawl a ni.

Mamoia hian ama pual YouTube channel ‘Mamoia Colney’ neiin, hetah hian drums zirna te en tur a awm a, tunlaiin Kohhran hrang hrangin electronic drums kan hmang
nasa ta a, a set dan thiam tawk lo tam tak kan awm a, chungte tan pawha chhawr tangkai theih tur, electronic drums set dan thlengin a YouTube channel-ah hian dah luh
zel a tum a ni.

Mamoia hian drums zirna school Probeats neiin, a zir duh tan Instagram mamoia_drummerboy leh Facebook-ah Mamoia Colney-ah te biakpawh theih a ni. Mamoia hi
producer a nih bakah merchandise T-shirt, hoosie, pop-socket, badge leh sticker-te a nei bawk e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy