Roma hmachhawn tur Sevilla

Ninga zan khan UEFA Europa League semi-final khelh zawh a ni ta a. Juventus hnehtu Sevilla leh Bayer Leverkusen hnehtu AS Romate final-ah an intum dawn. Roma in champion turin fiahna hautak an hmachhawn a ngai dawn a, an khingpui tur Sevilla hi Europa League-a champion ngun ber an ni.
Italian Serie A club lian AS Roma hian an mualah si khat faia an lo hneh tawh Bayer Leverkusen chu BayArena-ah an luhkhung. BayArena-a inkhel hmuhnawm takah hian goal thun tumin team hnihte an innawr tawn nasa hle. Mimualah tlawm zawk an nih tawh vangin German club hian an si phurh sut ngei tumin tan an khawh chiam thin a. Goal ven thiam Italian club tlar hnung an su tlang hlei thei lo. Defensivve khelh thiam Mourinho team ten hun tawp thlengin an goal an venghim tluan a, goal thun bik lo mah se an muala an chak tawhna an chhawr tangkai a. Si belhkhawmah 1-0 a hnehna changin final an lut.
Manager lar Jose Mourinho hian a enkawl team te European Competition final a hruai thlen tawh vawi ngaah a la champion pui vek a. Season liam ta ngei pawh khan Roma hi Europa Conference League-ah a lo champion pui tawh bawk. Final-ah he inelnaa hnuhma nei tha ber Sevilla hmachhawn dawn mah se Roma hian champion turin inrintawkna sang tak an nei ngei ang.
Sevilla an tlang.
Ninga zana semi-final dangah Europa League-a champion ngun ber Sevilla leh Italian club lian Juventus ten inkhel hmuhnawm tak an lantir a. Hun pangngaiah 2-2 an 1-1-a an inhnehtawk hnuin extrtime-a an goal thun an chakpui a, Sevilla in final an lut.
An muala chak zo lo Juventus hi Ramón Sánchez-Pizjuán-ah goal thun hmasa zawk an ni a. Minute 65-naah Dusan Vlahovic chuan hmahruaina goal a thun. He goal hmang hian mikhual team in si belhkhawmah 2-1 in hma an hruai chiah a, chak theih inringin an phur hman hle.
An mualah goal an chhuah hnuin Sevilla in goal thun an tum ngawrh leh zual a, an mikhualte an nawr na sawt hle. Na taka an khingpuite an nawr rah sengin minute 71-naah Suso chuan goal thunin an si phurh a sut. Hun pangngaih chak zawk an awm theih loh vangin extratime khelh a ni a. Minute 95-naah Erik Lamela chuan Sevilla hmahruai letna goal a thun. Minute 115-naah Marcos Acuña hnawhchhuah ni mah se Sevilla hi an chak zui ta tho a, Roma hmachhawn turin final an lut ta a ni.