Rome khua atangin PSG nena sawizawm Mourinho inpuchhuak dawn em?

Rome khua atangin PSG nena sawizawm Mourinho inpuchhuak dawn em?
Porto, Inter Milan, Manchester United leh a club vawn mek lai AS Roma behchhana European trophy panga hui tling tawh Jose Mourinho chuan Rome khaw club chu Europa League semi-final first leg match-ah chakpui leh tawh mah se season thara Paris St-Germain enkawl turin sawirik a ni mek.
Ningani zan Stadio Olimpico inkhelah second half tir lam minute 62-a Edoardo Bove goal khat tihluh hmangin Roma chuan Bayer 04 Leverkusen lakah 1-0 hnehna an sualchhuak a; kum 20 mi Bove hian Tammy Abraham-a shot dansak a nih hnuah a career-a European goal hmasaber a thun a; Leverkusen chance tha ber chu minute rukna leka Florian Wirtz-a’n goal ban sira a petchhuah a ni.
Hun pangngai tawp hma minute ruk la awmah Jeremie Frimpong chuan Rui Patricio tihsual atangin mikhual tan siphurh sutna hun remchang a hmu a, mahse, goal a thlen hmain dansak a ni.
Portuguese boss Mourinho hian a enkawl mek Serie A club hi season liamta khan Europa Conference League title hmasaber lakpuiin, kum 14 chhunga Roma trophy hmasaber sualchhuahpuitu hi ‘King of Rome’ tiin Italy ram lamah chuan an sawi a; tunah hian Europa League title final lut thei turin dinhmun tha takah a team a dinpui leh mek a, European title a lakzawnpui phei chuan Rome khawpuia a hmingthatna a zual dawn a, Stadio Olimpico lamah a hmingtha zual ang a, office pui luah zui zelna kawngah pawh nghet zual sauh tura ngaih a nih laiin PSG nen sawizawm a ni chho ta tlat si a ni.
Roma-a Mourinho contract neih lai hi kum 2024 nipui laia tawp tur ni mah se a career-a manager ni chunga chona a hmachhawn 11-na ni turin Paris St-Germain thawm a rawn lian chho leh mek a, Nilaini khan a hmalam hun tur zawhna nui chunga chhangin Sky Sport Italia hnenah, “Min ko a nih paqwhin min zawng hmu lo ang,” chu a han ti phawt a, Roma fans tan ngaihthat huaina tur ni pha tak ang maw?
Europa League hnehna changin Roma hian season tharah Champions League khel pha dawn ta se Frnce ram a pan loh mai rinna a len zual hmel a; Serie A kaltlanga Europe club inelna lian ber khel tur erawh chuan beisei a sang vak rih lo a, tun dinhmunah Giallorossi hi Italy top flight-ah pasarihna an ni pha chauh a, an beisei angin Champions League hi khel pha lo ta se Paris lam thlemna hi a hnial zo ang em tih zawhna a piang lo thei lo.
European final vawinga a hmachhawn tawhah Mourinho hi vawing a chak a, Europe club inelna kawtkaiah a hming hi sawinep theih a ni lo.
Hei tak hi Europe-a hlawhtling thei lo PSG tana it tham a tlin hmel a; tun season Champions League last 16 lamah ni se Bayern Munich an paltlang zo leh lo a, kum 2011-a Qatari mihausate’n Ligue 1 club an pumhmawm hnuah an awh ber trophy an la hlawhchhuak zo tlat lo a, tuna an boss chhawr lai Christophe Galtier hi season tawp ruala chhuak tura ngaih ngheh tawh niin, Europe-a tlangnel em em tawh Mourinho lam an hawi pawh hi an tan tih awm tak niin a lang!