Ronaldo leh a bialnu an inhual ve ta nge nge ?!

Ronaldo leh a bialnu an inhual ve ta nge nge ?!
Kara fanau awm dum dum tawh thlenga innei loa chengdun thin khawthlang mite zingah football legend Cristiano Ronaldo leh a kawppui Georgina Rodriguez-te pawh telin, kum riat zet an khawsak dun hnuah tunhnai khan an inhual nia ngaih theih turin thlalak an tichhuak ve ta leih leih a, tah chuan inhualna zungbun niawm tak pawh hmuh tur a awm!
Georgina hian tunhnai khan social media lamah a kutzungtanga lunghlu zungbun a bun lai thlalak a phochhuak a, caption-ah, ‘Si, quiero. En esta y en todas mis vidas’ tih ziakin, chu chu sap tawngin ‘Yes, I do. In this life and all my lives’ tihna a ni an ti a, Mizo tawng chuan thinlung leh tih takzeta an inhualna a pawmzia sawina a nih duh hmel a, tha in tih angin lo phuah rem teh u!
Fans lamin inhualna ni ngeia an ngaih laiin Ronaldo hi chuan he thu buatsaih lai thleng hian a social media platfomr lamah a nemnghehna a la tarchhuak ve lo thung.
Ronaldo leh Rodriguez-te hian kum 2017 tir lam khan vantlang hriatah an inkawp tih an phochhuak a, khawvel hmuha an inkawp tih an lanchhuahtirna hi Zurich khuaa FIFA Football Awards an chhim tumin a ni nghe nghe.
Georgina hi Argentine thisena piang ni mah se Spanish model niin, social media influencer an tih ang hi a ni tel bawk a, Ronaldo football zinkawnga mi langsar ber a ni chho ta a ni.
Tuna kum 40 mi ni ve tawh Ronaldo hi naupang pangate pa niin, a fa upa ber Cristiano Jr. hi kum 2010-a tunge a nu tih khawvel hriata puanzar loh hmeichhia laka lo piang niin, khatih lai khan Ronaldo chu kum 25 mi a ni.
A fa hming koh hi ‘surrogacy’ an tih kaltlanga a hrin niin, hei hi pawisa hlawha mi fa paisaktu hmeichhe kaltlanga fa neih tihna a ni.
Surrogacy-ah chuan tu emaw nupa emaw mahnia fa pai duh chiah lo emaw ramchang chiah lote’n an chi chu tu emaw hmeichhia an paitir a, an fa lo piang chu a pian hlimah lain, a paitu nu chu an thup ta thin a; Ronaldo pawh hian tun thlengin a fapa hi a paitu nu an la hriattir lo a nih hmel!
Cristiano Jr. pawh nu tak chawi lohin rawlthar a rawn ni chho ve tawh a, tunah hian ei la tling chiah loin a pa khelhna Al-Nassr youth academy-ah football khelh a zir mek a ni.
Kum 2017 kan ‘surrogacy’ kaltlang bawk hian Ronaldo chuan phir unau Mateo leh Eva tia an hming sak chu a hring leh a, hei hi United States lama an hrin a ni nghe nghe.
A bialnu leh chenpui ni bawk Georgina nen hian kum 2017 tawp lam khan fanu Alana Martina an tih chu an nei tawh bawk.
Ronaldo-te nupa fa naupang ber chu kum 2022 April thla khan a lo piang a, hmeichhia niin, a hmingah Bella Esmeralda an sa a, a phirpui mipa erawh a pian atanga rei loteah a thi hlauh a ni.