Ronaldo nen hian thian kan ni lo – Messi
Kum za bi 21-na football history-a player khaikhawn hlawh leh inel ber tira sawi loh theih loh Argentina captain Lionel Messi leh Portugal international Cristiano Ronaldo-te inkara inhruipawhna hi anmahni inkar aimahin an fans inkarah hian a na zawk awm e tih tur a nih laiin tunhnai khan Argentine chuan Portuguese nena an chungchang a sawichhuak a, thian an nih hran lem loh thu a sawi!
Footballer ropui bik pahnih hi league thuhmunah season kaw chhung zet club inang lo vuan chungin an lo inhmachhawn tawh thin a; anni pahnih kha khelmual chhung leh pawn lam thlenga Barcelona leh Real Madrid boruak vaw hot zualtute an ni!
Ronaldo leh Messi hian belhkhawmin tun thleng hian official trophy 79 an la tling tawh!
Heti taka footballer daih rei leh khaikhawn hlawh, mimal lawmman sem apianga an inpawhna boruak lian em em thin hi anmahni leh anmahni ve ve chu an inzahtawn tlat a, anmahni tantute inkawk sawk sawk mah se anni lam chu an dam vei dap a; ‘ka tha ber’ ti tura inhmeh zawk mai awma ngaih theih Cristiano Ronaldo pawhin an kawmnaah Messi nena an inpawh ve rengna chuan player tha zawk ni turin phurna leh thathona a siamsak tih a sawi.
Tunhnai khan Lionel Messi pawh hian Portugal captain nena an chungchang a sawichhuak a, FIFA Club World Cup 2025 khelh lai khan D Sports-in an kawmnaah, “Cristiano Ronaldo hi thuk takin ka zah a, ka ngaisang bawk a, a career-a a hlawhchhuah tawh leh hlawhtlinna dang chang zel tura a beihna te, level sang bera a la khel zui zelte hi pui ka ti.
“Kan inelna/inhmelmakna (rivalry) hi chu khelmual chhungah chauh a ni a, kan team ve ve tana kan enkim hlan kan duh ve vena zawn atanga intlansiak mai kah ni.
“Khelmual pawn lamah chuan mi satliah ve ve mai tho kan ni a, thian kan ni lem lo nain kan inkarah hian inzahtawnna a bet tlat a ni,” a ti.
He thu buatsaih lai thlengin Messi hian trophy 45 hawn tawhin, Ronaldo kutah trophy 34 a lut ve tawh thung a, hei hi an senior career ve ve atanga an hlawhchhuah niin, season khat chhunga belhkhawma goal 50 khung pel fo ve ve an ni bawk.
International Federation of Football History and Statistics (IFFHS) chhinchhiah danin anni pahnih chiah hi club leh ram tana goal 800 thun tling ve ve awmchhun niin, trophy la tlem zawk Ronaldo hi official goal thun hnem zawk a ni ve thung.
An pahnih inelna hi Ali-Frazier, Prost-Senna, Djokovic-Nadal leh Federer-Nadal tihte nen khan huang khata dah chi a ni ang.
Messi hi La Liga all-time top goal-scorer a nih bakah he competition history-a assist ngah ber a ni tel a; chutih laiin Ronaldo hi Spanish top flight-a goal thun leh siamchhuah kawnga Messi dawttu chiah a nih bakah Champions League lama match khel hnem ber leh goal khung tam ber niin, assist lamah erawh chungnung ber Ryan Giggs dawttu a ni.
Messi hi Champions League khelh tam lam leh assist siamchhuah kawnga pathumna ve ve niin, he competition history-a goal khung hnem ber dawttu a ni bawk.
Ronaldo hi international match khel hnem ber leh international goal khung hnem ber a nih laiin Messi hi international match khelh tam lamah 11-na a ni a, goal thun hnem kawngah pathumna a ni tel.maw?
Ronaldo nen hian \hian kan ni lo – Messi
