Reuben Lalnunthara Hnamte
Mihring tungchhova piang tawh phawt hi chuan mi ropui nih hi kan duh deuh vek awm a sin. Kan ropui tihzawng erawh a inang lem lova; naupangte chuan ropui an tih chu a dang a, puitling zawkte pawhin ropui kan tih chu a in anglo nual ngei ang. Kan lo puitlin hnu hian mi ropui nih emaw, dinhmun ropui luah emaw kan chak fo thin. In ropui neih kan duh a, mi chunga leng nih kan duh a, mi hausa nih kan duh a, mi chunga leng nih kan duh bawk thin. Ropui inchuhna hian khawvel siam hma ata tawh buaina hi a siam tam khawp mai a; setana chuan Pathian aia ropui nih a duh avangin Pathian a dova, hneh ngei tumin a bei a, mahse, amah chu hneha awmin van atanga paihthlak a ni ta zawk a ni. Khawvela indopui lochhuah thinna te pawh ropui nih duh vang a ni chawk. Hitlera chuan khawvel hneha ropui taka inseam tumin Europe ala duai duai a, mahse, hnehin a awm ta zawk a nih kha. Chutiang bawkin hmanlai lal hote pawh khan ropui nih kha an duh a, anmahni kha Pathian ang hiala inngaiin, an mipuiten pathianah an biak an beisei thin a ni.
Ropui nih duhna hian remna aiin indona a thlen a, khawvelah pawisawi lo mi tam tak an thih phah a, mi tam tak piansual phahin, tuarna chauh lo chu hlawhchhuah a neilo tih mai tur a ni. Hnehtu nih duhna, ropui nih duhna hian khawvel leh hringnun hi acva chawkcbuai tehlul em! Chungnung zawk, ropui zawk nih inchuhin ram leh ram an indova, chu chuan khawvel leh ram tam takah pawisawi lo nunauteah tuarna nasa tak a thlen thin. Pathian thute duh hle anga langin kohhrante pawh kan han ding a, ropui zawk nih duh avangin kohhranah meuh pawh intihthiamlohna leh inthenna hial a hring chhuak a. Kristian inti, ringtu inte zingah pawh ropui nih duhna hian innghirnghona leh inthenna a ti tam hle bawk. Kohhran chhungah pawh inngeihlohna chhuahna tam ber chu ropui zawk, challang zawk nih duhna hi a ni fo thin. Pawl hoahte pawh inthenna leh pawl chaklohna thlentu tam tak chu ropui zawk nih duhna avang hi a ni fo. Ropui nih duhna hian khawvel leh he hringnun ngei pawh hi a tibuaiin a tikhaw lo takzet a ni.
Ropui duhna hian Lal Isua zirtirte meuh pawh a kal pel bik hauh lo. “Vanramah tu nge ropui ber ang le?” (Matthaia 18:1) tiin zawhna an zawt hial mai a ni. Rawngbawlna kawnga pawh hian ropui zawk chungnun zawk nih duhin kan intlansiak a, mite hmuha langsar leh fel awmtaka lan chu kan thiam viau. He ropui nih duhna hi mihringa ze bet tlat pakhat chu a ni ve hrim hrim a ni. Tunlai khawvelah pawh hian ropui nih duhin kan phe suau suau a, a thim a var pawh thlu lo leh a mawi leh mawi lo pawh dawn lovin kan bawh huam huam a ni ber mai. Politics ni se ram hmangaih tak takna aiin ropui leh lansarh duhnain kan khat a, pawl hovah nise chu ti bawk. Ropui duhna hian kristianna meuh pawh hi a eichhe mek a, kohhran pawh hi a eichhe mek a ni. Mi hausa tak te, nihna sang tak neite hi mi ropui an ni hran lo; kan ropuina zawk hi chu midangte min thlir danah hian a innghat daih a ni. Hausakte, nihna sang neihte hi chu a kumhlun lo, rei lo teah a ral mai; mi thinlunga kan ropuina erawh hi chu kan thih hnu thleng pawhin a zual zel zawk a ni.
“I hnain thuneihna a pe che a, I nungchangin zahawmna” tiin Irwin Federnman a lo sawi daih a sin. Thuneihna, lalna, lansarhnate hi mi tam tak chuan ropuinaah kan ngai thin. Chumi chak chuan kan bei tang tang thin a, a mawi leh mawilo, mi thinlung tihnat leh tihnat loh lam pawh ngaihtuah lovin kan phi ruai thin. Ropuina awmzia tak kan hmuh thelh vang a ni chawk. Hotu lal tak emaw, an dinhmun avanga mi chunga leng thinte pawh hian an hote leh mipuite zah leh ngaihsan nih an inbeisei thin a. Mahse, an nungchang leh awmdanin a zir loh chuan a lang lamah zahawm takin awm mah se, hnung lamah an nuih zui thin. Chhungkuaah pawh Pa ber nih avanga engkima thunei nia inngaia mahni nupuite leh fateah thuneihna hmanga invaupung chi tam tak kan awm a, mahse, kan fate an lo liana thuneihna leh vauna hmanga kan thunun theih loh hun a lo thleng a, chhungkaw tan a pawi thin a ni. Kan nungchang leh nundanin a zir miau loh chuan kan hneh theih loh hun a thleng thuai mai. Chhungkaw ropui kan tih te hi hausa tak leh in ropui tak nei ngawtte hi an ni hauh lo. Pathian tih chhungkua, an bula awm nuam leh chhungkaw hlim, midangte tan hnawksak lo te hi an ni a sin. Chungte chuan thlahte thlengin malsawmna an dawng thin.
Ropuina hi chu tlawmna nun daih hi a ni a sin; Isua pawh khan he khawvela a awm lai khan lei leh vana thuneitu a nihna kha a chelek reng reng lo. Mihring tihduhdah leh hmuhsit hlawh mah se, a nungchang leh awmdan khan zahawmna a keng tlat a, a hun teah lo chuan sipaiho leh puithiam lalte pawh khan an man ngam reng reng lo. Eng hi nge ropuina tih in hriat duh chuan mi chunga len theihna hi ni lovin nungchang zahawmna zawk hi a ni tih lo hria ila, hriselna tha neih hi a ni bawk. Ropuina chu min tinaa min tichhe thin thil kalsan theihna te hi a ni a, khatiang hmanga midang tihchhiat ve loh te kha ropuina dik tak chu a ni. Mite na taka siamte hi ropuina leh hnehna, thuneihna a ni reng reng lo tih hi kan hriat a pawimawh. I nun dan fimkhur la, i hriselna vawng tha la, zahawm takin nung la, mi ngaihah mi ropui i ni mai ang. Thinlung takin Pathian tih la, dikna leh rinawmna vawng tlat la, mi ropui nih i hlawh ang. Ropuina hi tawngkan thiam zuap zuap leh thusawi thiam a ni ber lova, i nun danin mi rilru a hneh a, a tha zawnga mi thinlunga i awm chuan chu chu i ropuina zel tur a ni e.
ROPUINA HI ENG NGE?
