ROSE & Bruno Mars ‘APT.’ a lar ber
ROSE leh Bruno Mars hla hit ‘APT.’ chu Billboard Global 200 chart-ah a No.1 a, he chart-ah hian a zawn ni lovin kar 10 a No.1 tling ta. Hetihrual hian Lola Young ‘Messy’ chu Top 10-ah a lang thar ve ta bawk.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuang a official-only stream (subscription leh ad-supported audio leh video music services) leh download sales te chu tehna pawimawh a ni.
‘APT.’ hian kar khat chhungin stream maktaduai 144.8 leh sales 19,000 a la kai leh thei a, hei hi chart-ah No.5 atangin No.1 a rawn kai pui le ta a ni. He hla hi Krismas boruakin min tuam hma khan chart No.1 a ni reng a, Krismas vuakvetah khan Krismas hla lar vanglai pawhin chart top 10-ah a la lang thei a, tunah a rawn No.1 thar leh ta a ni.
Chart No.1 hlui, kar riat No.1 ni thei Lady Gaga leh Bruno Mars ‘Die With a Smile’ chu stream maktaduai 130.1 tlingin No.10 atangin No.2-ah a invawrh thar leh a, he hla hi a zawnin kar 18 chhungin chu kartin stream maktaduai 100 a la kai thei ziah a, hetiang tithei awm chhun a la ni.
Chart No.1 hlui bawk Billie Eilish ‘Birds of a Feater’ chu No.20 atangin No.3 a kai thar leh a, Gracie Abrams ‘That’s So True’ pawh No.21 atangin No.4-ah a invawrh thar leh a, chart No.1 hlui Sabrina Carpenter ‘Espresso’ chu No.40 atangin No.5 a kai thar ve leh ta bawk.
Lola Young hla ‘Messy’ chu stream maktaduai 36.1 leh sales 6,000 tlingin No.56 atangin No.8-ah a invawrh a, Lola hla he chart top 10-a lang thei hmasa ber a ni. A hmaa he chart-a a tawn san ber chu Tyler, the Creator a feature-na ‘Like Him’ niin, nikum November khan No.37 a kai.
Billboard Global 200 Top 10:
1 APT. – ROSE & Bruno Mars
2 Die With A Smile – Lady Gaga & Bruno Mars
3 Birds Of A Feather – Billie Eilish
4 That’s So True – Gracie Abrams
5 Espresso – Sabrina Carpenter
6 Luther – Kendrick Lamar & SZA
7 Beautiful Things – Benson Boone
8 Messy – Lola Young
9 Lose Control – Teddy Swims
10 Who – Jimin
ROSE & Bruno Mars ‘APT.’ a lar ber
