Reserve Bank of India (RBI) chuan Delhi High Court hnenah Rs 2000 laklet leh chu demonetisation a ni lo va, tihdan pangngai zawk niin thil tha zawka kalpui a nih theih nana hmalakna a ni tiin a sawi.
Court chuan lawyer Ashwini Kumar Upadhyay an RBI leh SBI tena hriattirna tichhuaka Rs 2000 note chu bank-ah identity tihchianna ken ngai kher lovin thleng theih a ni an ti chu sir khat leh dan kalh a ni tia a khinna a ngaihtuah a ni.
Bench of Chief Justice Satish Chandra Sharma leh Justice Subramonium Prasad te chuan thuremna an siam thuai tur thu an sawi nghal a.
Upadhyay chuan Rs 2000 banknote hnuhlet leh tura thutlukna siam chu a khing lo tia sawiin a khin ber zawk chu identity tihchianna awm hauh lova thleng theih tih zawk chu a ni a ti a. Rs 2000 banknote exchange chu bank account-a deposit hmanga kalpui ni se a ti bawk a.
“Eng vangin nge ID proof tul lo an tih? Mirethei ber te pawhin Jan Dhan account an nei vek alawm. BPL te pawhin bank account an nei vek tawh a,” tiin Upadhyay chuan a sawi a, tuna ruahmanna ang hi chuan mafias leh gansters te ‘Atiq Ahmed thuihruai leh Maoists’ te tan a tha tiin a sawi.
Senior advocate Parag P Triparthi, RBI aiawha ding chuan court chuan chutiang thilah inhnamhnawih theihna a nei lo tia sawiin Rs 2000 currency note thleng tih chu operation lama awlsam zawk nan tih liau liau a ni a ti thung a.
“Hei hi demonetisation a ni lo. Rs 2000 note chu hman tlang lawn leh uar a ni lo. Pawisa note dangin mamawh a phuhru em em,” tiin a sawi bawk a.
“Statutory exercise a ni a, petitioner te thil sawi hmanga constitutional issue te nekchepna engmah a awm reng reng lo,” tiin a sawi ve thung a.
Petitioner chuan ngenna a siamah RBI leh SBI tena Rs 2000 thleng nana identity proof ngai lo an ti chu sirkhat chauh ngaihtuahna, awm ang lo leh Article 14 of the Constitution kalh a ni, a ti a.
Petitioner chuan currency thahnem tak te chu mimal ten dah thain emaw seperatist, terrorists, Maoists, drug smugglers, mining mafias leh corrupt mi ten an thukru tiin a sawi bawk a.
Pawisa note hlutna sang nei inthleng tawn chu eirute leh dan kalha che heng terrorism, naxalism, separatism, radicalism, gambling, smuggling, money laundering, kidnapping, extortion, bribing leh dowry, etc. te chelek leh hman rim ber a ni a ti a. RBI leh SBI te hian Rs 2000 note chu bank account-ah ngei deposit turin ti se a ni tur a ti bawk a.
“Tun hnai lawkah Centre-in chhungkaw tinin Aadhaar card leh bank account an nei vek tur a ni a ti a. Chutih laiin RBI chuan identity proof tel lovin Rs 2000 banknote thleng a remti a. 80 crore BPL famility ten free ration an dawng a, chumi awmzia chu 80 crore Indians ten Rs 2,000 note an hmang khat hle tihna a ni. Hei vang hian RBI leh SBI te chuan Rs 2000 banknote te chu bank account-ah chauh dahluh ni se an ti mai tur a ni,” tiin ngenna chuan a tarlang.
Bank account ngeia Rs 2000 currency note dah luh a nih chuan black money leh an sum lakluh nena inmil lo sum nei te chu awlsam takin chhinchhiah an ni mai dawn a ni tiin a sawi bawk.
May 19 khan Reserve Bank of India (RBI) Rs 2000 note chu pekchhuah tawh loh turin thupek a chhuah a, a note awmsa leng mek te pawh September 30 hma ngeia bank-a thleng turin hriattirna a pe bawk a. Mahse, bank note Rs 2000 chu legal tender a la ni rih reng ang tiin RBI chuan thuchhuah a siamah a tarlang bawk.
Hei mai bakah hian RBI chuan Rs 2,000 banknote te chu bank-ah tum khatah Rs 20,000 hu zel thleng theih a ni ang a ti bawk a, chu chu May 23 atanga kalpui tan a ni bawk a ni.
Rs 2,000 note Bank deposit ngei phut
![](https://theaizawlpost.org/wp-content/uploads/tap_logo-min-large.jpg)