Mizoram State Information Commission din a nih hnu ah Right to Information Act hmanga thil hriat duh dilna thehluh 27122 a awm tawh a, zawhna chhang tura department-in a ruatte chhan dana lungawiloa thuneitu sang zawk hnena zualko ngai chu zaa 2 vel a ni.
Mizoram State Information Commission (MSIC) chief information commissioner John Neihlaia sawi danin, MSIC din tirh (2006 July 5) atanga RTI dilna lut hi kumin January 29 thleng khan manual-in 18985 a ni a; 2022 July 1 atanga online-a dilna thehluh theih a nih hnu ah dilna 8137 a lut tawh bawk. Heng atang hian state public information officer (SPIO) chhan dana lungawilo, thuneitu sang zawka zualko 157 leh thuneitu sang lehzuala zualko (second appeal) 136 an awm a, dilna lut zawng zawng atanga chhutin zaa 2 vel a ni.
“RTI hmanga dilna lut atanga appeal hi zaa 2 a tling loa, a bak za 98 chu SPIO chhannaah an lungawi tawk niin a lang a. An thawk tha thawkhat hle niin a ngaih theih. Second appeal thleng hearing neihah SPIO chhan dana lungawilo, departmental appellate authority (DAA) a kal, DAA chhan dana la lungawi chuang lo an tam dan atang hian, DAA hian zualkona hi an ngaihsak tawk loa, an tih tur an ti tawk lo em ni aw tih a ngaih theih bawk,” a ti.
RTI hmanga thil diltute vuivaina dawn leh chu’ng vuivaina enchian chu MSIC mawhphurhna a ni, tiin, civil court anga hearing-te neiin, zualkona thu thehluttu leh SPIO-te koin, information pekchhuah chungchangah thuthlukna an siam thin tih CIC hian a sawi a. RTI Act 2005-in a phut angin SPIO zingah thupek zawm lo an awm a nih chuan sumfai chawitir (penalty pek) theihna a neih bakah disciplinary action la turin sawrkar thuneitute hnenah thu a rawn thei tih a sawi. Zawhna chhangin MSIC hotute chuan, SPIO pathum chu sumfai chawitira hrem an ni tawh tih an sawi a ni.
MSIC hmalakna in 2023 May 30 atang khan local council chairman-te chu public authority-a puan an ni a. August 9 atang khan village council president-te pawh public authority-a puan an ni. LC/VC level-a sawrkar atanga lut hmasawnna hna thawhna thila hnathawh dan leh sum hman dan hrechiang a, zawhna zawt duh tana tih a nih thu CIC hian a sawi a. DAA atan LC-ah AMC, VC-ah DLAO te ruat an ni tih a sawi a ni. Hei hian MSIC pan kher ngai loin mipuiin an hriat duh zawh theihna kawng a a hawng tih a sawi.
RTI danin a phut angin sawrkar deparment tin chu, mipuiin RTI hmanga an zawh kher ngai loin, mipui hriat duh awm zawng zawng an department website bakah chanchinbu, vantlang aurinna ang chi a dah – suo moto disclosure tura tih an nih laiin, department thenkhatin an dah lo thin chu MSIC chuan hma a la chho zel tih John Neihlaia hian a sawi bawk.