Tun lai hian district hrang hrangah RTI Week hman mek a ni a. India ramin RTI Act a hman tan atanga a kum 6-naah Mizoramin RTI Week hi kan hmang ve tan a. RTI Week hmasa ber hi October ni 5, 2011 khan Vanapa hall-ah khatih laia chief minister Pu Lal Thanhawla khan a hawng a. RTI Week denchhen hian RTI Leaflets leh RTI Booklets (SPIO leh information diltute tana kaihhruaina) te pawh tihchhuah a ni.
Hun a lo kal zel a, RTI Week hi urhsun takin district tinah hman a ni chho ta zel a. He hapta hman thin hian rah tha tak a chhuah chho zel a, mipui lam pawhin a pawimawhna leh tangkaina kan varpawh chho ve zel niin a lang.
Hetih lai hian, RTI booklets tha tak a awm chung hian, sawrkar department hnuaia RTI buaipui tur bika ruat thenkhat chuan RTI chungchang hi an bel tawk lo fo a, an bel lo pawh ni satliah lovin, an ngaihsak tha tawk lo niin a ngaih theih. Tunhma deuh khan, RTI Act behchhana information dilna lo dawngsawngtu official thenkhat chuan registration fee Rs 10 dawnna receipt pekchhuah tur pawh an nei lo va, phuahchawp taka kalpui nawk nawk a ni thin. |henkhat erawh chuan receipt bu leh registration fel tak neiin fel takin dan angin an lo dawngsawng thlap thlap ve thung. A chang chuan information diltute lo dawngsawngtu zingah enge information an dil chhan lo hriat ve phet tum an awm bawk.
RTI dan ang chuan SPIO ten information hi ni 30 chhungin a zawttute an pe chhuak tur a ni a, an pe chhuak lo a nih chuan information diltu chuan Departmental Appellate Authorities-ah complaint a thehlut thei a, chuta thu a la fel loh cheu chuan Information Commission-ah la kalpui lehzel theih a ni. hetih lai hian, ni 30 a ral tawh hnu pawha information pechhuak thei lo SPIO an awm laiin, complaint buaipui peih lova thlir liam mai mai information diltu zingah an awm thin bawk. Hei hi mipui lamin a tawp thlenga kan buaipui peih ve a pawimawh.
Sawrkarin ram hmasawnna hna thawh a nih dan langtlang taka mipuiin an hriat ve vek theihna tura dan tha tak a siam hi chhawr tangkai tum si lova, a phawvuaka phunnawi hrat leh viau si kan ni ang tih a hlauhawm a. Ramin hma sawn se, mipuiin hmasawnna a nih dan tur angin tangkai pui bawk ila tih kan duh chuan, RTI Act hi awmze nei taka tun aia uar zawka kan hman hi hi a pawimawh a, chu chu ram leh hnam thatna tur zawk a ni.
RTI Week leh a behbawm…
