Daily Newspaper

Ruahsur nasa kaihhnawihah mi 23-in nunna chan

29

Pathianni khan Mumbai khawpuiah ruahsur nasa kaihhnawih vangin a tlem berah mi 23-in nunna an chan a. Zankhuaa ruah nasa taka sur chuan Mumbai tuamin tui tling nasa tak a siam a, chu chuan local train service leh vehicular traffic te a tibuai hneh hle.

Maharashtra CM Uddhav Thackeray chuan nunna chan chhungte hnenah Rs 5 lakh theuh an pektur thu sawiin hliam tuarte enkawlna pawh State-in a tum vek tur thu a sawi bawk.

Prime Minister Narendra Modi pawhin ruahsur nasa kaihhnawiha Mumbai-a nunna chan an awm chu pawi a tih thu sawiin mitthi chhungte hnenah Rs 2 lakh theuh Prime Minister’s National Relief Fund atanga pektur a nih thu leh hliam tuarte hnenah Rs 50,000 theuh pek a nih tur thu a sawi a.

“Chembur leh Vikhroli a bang chim avanga nunna chan ten min ti na hle a. Lusun chhungte ka tawrhpui takzet a, hliam tuarte an that chhuah vat ka duhsak bawk,” tiin Modi chuan a sawi.

Bhandup water treatment plant a power supply a khaihlak avangin Mumbai hmun thenkhat chuan tui lama harsatna an tawk tura ngaih a ni bawk.

Pathianni zing lam khan Mumbai-ah hian house-wall chim avangin mi sawm pasarihin nunna an chan a, pahnih chu damdawi in panpui an ni.

Chembur-a Vashi Naka area-ah pawh retaining wall chim vangin mi pahnihin nunna an chan bawk a. Surya Nagar-ah pawh leimin vanga hutments 5 vel chim vangin mi pathumin nunna an chan bawk a, mi pahnihin hliam an tuar bawk.

Central Railway leh Western Railway te chu rel kawnga tui a tlin nasat lutuk avangin rel an tlan thei lo bawk.

India Meteorological Department (IMD) te chuan climatic condition inthlak thut avangin Mumbai hian darkar ruk chhung lekin ruahtui 100mm a dawng tiin an sawi.

IMD te chuan Mumbai hian ruahsur nasa a la dawn theih avangin fimkhur turin hriattirna an pe chhuak zui bawk a. IMD te hian Mumbai tan red alert tichhuak nghalin colour-coded green atangin red an pe a. ‘Green’ alert chu thil pangngai mai niin thuneitute inpuahchah pawh ngai lo niin ruahsur pangngai ni tura ngaih a ni a. ‘Red’ alert a nih chuan ‘warning’ ni tawh thungin hmalak ngai a ni a. ‘Orange’ a nih tawh chuan inralring tur tihna a ni thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy