Central leh Eastern Europe ah ruahsur nasa avangin luitui tam tak lianin chu chuan chenna in sang tam tak a tichhia a, harsatna a thlen nasa hle.
Romania a Storm Boris tleh chuan harsatna namenlo thlenin south-eastern region Galati ah mi pali in nunna an chanphah bawk a.
Czech Republic ah pawh tuilianin harsatna thlenin mi tam tak hmn himah thiarchhuah niin northern areas lamah chenna in 51,000 chuang chu powe rpek theihlohin an awm mek tiin Czech power company CEZ te chuan an sawi a.
Poland ah pawh Czech Republic ramri hnaiha Glucholazy khuaa chengte chu a bul tuilian a nasat avangin hmun hima thiarchhuahin an awm bawk.
“Climate change nghawng kan tawng mek a, a bik takin European continent ah a nghawng a nasa zual a ni” tiin Romanian President Klaus Iohannis chuan a sawi.
Europe chu hun dang zawng aiin khawvel hmun tamtak ang bawkin climate change vangin a hnawng zual dawna ngaih a ni a. Atmosphere lum zel chuan hnawng tam tak dawng theiin chu chuan ruahsur nasa zawk a thlen thei thin a ni.
Romania a Galati region a a Slobozia Conachi khua mayor chuan tuilianin chenna in 700 chuang ala tiin a sawi a. “Chhiatna turu tak kan la tawn ngailoh kan tawng a ni” tiin Emil Dragomir chuan a sawi.
Poland chhim thlang lama Opole region a Glucholazy ah pawh firefighters te chuan sandbag te chu tuilian dan nan theihtawpin an tungkhawm bawk a. Poland a khawpui lian ber dawttu Krakow ah pawh tuilian dan nan sandbag an hmang nasa hle.
“Tun hi ka dam chhung huna tun anga tuilian nasa ka tawn vawi hnihna a ni a. Helaia cheng te tan chuan a rapthlak takzet a ni” tiin Glucholazy a cheng Piotr Jakubiec chuan a sawi a. Sandbag mai bakah tuilian chu thiehtawpa pump chhuah tuma an beih thu a sawi a.
He khuaa cheng tho Zofia Owsiaka chuan khuaa cheng te chuan hlauhthawnna an neih vek thu sawiin ruahsur lahin tawp a tum bawk si lo a ti bawk.
Wroclaw khuaah pawh a khua cheng tam tak te chu flood safety measure lak avanga lift te hman a theihloh hnuah high-rise block pan nan leihlawn an zawh a ngai bawk a.
Czech Republic ah pawh South Bohemia region ah dam insahin Environment Minister Petr Hladik chuan he dam hnaiha cheng te chu an chenna chhuahsan tura inpeih turin a hriattir a ni.
Hladik chuan ruahsur nasa lutuk avangin ruahtui a tling nasa lutuk tawha chu chuan tuilian siam theihna a tisang tiin a sawi a, Czech Republic ah hian thawhlehni thlengin ruah a la sur tur anga ngaih a ni bawk.
Karkalta khan Czech Republic a league football match pahnih te chu a khelh hun sawn a nihphah hial bawk.
Ruahsur nasa vangin Europe in tuar
