Ruahsur nasa vangin South Korea-ah nunna chan tam

Ruahsur nasa avangin South Korea ah tuilian leh leimin nasa tak thlengin power cut a nasa hle bawk a.
Ruahsur nasa kaihhnawihah hian mi 26 in nunna an chan anga ngaih niin mi sawm chu an chin hriat lohin an la awm mek bawk a.
Hei bakah hian tunnel 685 metre a seiah mi engzah nge tang tih hriat theih a ni lo va, an rual hian vehicle 15 chu a tang ngei tih chian a ni thung.
Officials te chuan Osong, Cheongju khawpui bula tunnel chu tuilianin a chiah tiin an sawi a, a bula lui te a len thut avangin driver leh passenger te an insaseng hman lo tiin an sawi.
Pathianni zing khan ruang paruk lakchhuah a ni a, damin mi pakua chhanchhuahin an awm tawh thung a, tihian tuilian kaihhnawih avanga nunna chan hrim hrim 33 an awm tling tawh tia sawi a ni.
Chhiatna tawhna nasatna ber ber te chu tlangram North Gyongsang region lamah niin leiminin chenna in a hnawl a tam hle a, South Korea-ah hian kar kalta Inrinni khan ruahtui 300mm lai a tla a ni.
South Korea hian kum khatah 1,000mm atanga 1,800mm vel ruahtui a dawng thin niin Korean Meteorological Asosciation te chuan ans wi a. Mahse, tun hnaiah hun reilote chhungin a tla nasa lutuk tiin an sawi.
Kar kalta Inrinni atang khan Goesan Dam, North Chungcheong thenawm lawka mi chu a kuang a luanliam tawh avangin a bul hnaia cheng 6,400 vel te chu hmun himah thiarin an awm bawk.
Korea Meteorological Administration te chuan Nilaini thlengin ruahsur nasa a la thleng dawn tiin an sawi a, hei vang hian dinhmun a duhawm rih loh hle thu an sawi bawk.
Kar kalta vel khan ruahsur nasa leh tuilianin India, China leh Japan mai bakah ram hrang hrangah harsatna nasa tak a siam a. Tuilian nasa hi scientists te chuan climate change thleng tia sawiin ruahsur pangngai aia nasa a siam vang an ti a.
A lum poh leh atmosphere ah hnawng tamin chu chu inchhekkhawm tam zel chuan ruahsur nasa zawk siamin a chang chuan hun rei lo te chhungin hmun zimteah te a sur chiam zel an ti bawk.