Daily Newspaper

Ruahtui khawl

243

Sawrkar laipui hnuaia tui lam buaipuitu Ministry of Jal Shakti-in ruahmanna an siamsak angin Mizoram MP(RS) chuan Rajasthan sawrkarin ruahtui a khawlkhawm dan te zirchiangin tunhnai khan Jodhpur khawpui leh a chhehvel a tlawh a. MP chuan thalah Mizoramin tui lama harsatna a tawh thin chhan chu ruahtui khawlkhawm nachang kan hriat tawk loh vang a ni, tiin a sawi a.

Rajasthan-ah hian a bikin Jodhpur district-a kum khata ruahtui tla hi 370mm vel chauh a ni a. Chuti chung chuan tlangchhip sang laiah te, tlang pangahte ruahtui dawnkhawmna tur an khuap a, a thlitfimna tur hmunte siamin leihnuaia a luanchhuahna tur an siam a. Inchunga ruahtui leh tuallaia ruahsurte dahkhawl nan dil tam tak an siamchawp bawk a. Ruahtui khawl an ngaihpawimawh avangin tui in tur hi tlachham loin an awm thei a ni niin MP chuan a sawi bawk a ni.

Mizoramah hian kum tin ruahtui 2500mm aia tam a tla thin nia chhut a ni a, chu chu Jodhpur ruahtui tla let sarih deuhthaw a ni a. Ruahtui tlak tlemna hmunah tui tlachham lovin an awm thei a, ruahtui tlak tamna Mizoramah chuan |hal laiin tui kan harsa em em thung a. Heta tang hian ruahtui khawl khawm thatna leh pawimawhna chu a lang chiang nghal mai awm e.

Kum 15 vel liam taah khan, India sawrkar chuan ruahtui khawlkhawm pawimawhna leh hlutna hre tura mipuite chawh harh nan Rain Water Harvesting Week kha a buatsaih tan a. Mimal a tua te pawh, anmahni in leh lo atanga ruahtui khawl khawm duh apiang chu a hmanrua a thlawna pek tur, ti te pawhin sawrkar laipui khan a campaign hial a nih kha. Thawkkhat lai khan hemi denchhen hian Mizoram thingtlang khuaah pawh ruahtui khawlna tur tuizem te pawh sem niin, kha khan engemaw chen chu thingtlang lamah chuan tuiharsatna a sukiang ve deuh niin a lang.

Mizoramin kumtin ruahtui tha tak kan neih thin avang hian kan ngaih hi kan ti tha ve ngawt mai niin a lang a, mahse ruahtui pawh hi a kiam tial tial a, ruahtui hip khawltu ramngaw kum tin kan tihchereu reng avangin underground water a phai zel a, lui tui pawh a kam phah a, hei hi kan tuar chho mek a ni.

Hetih lai hian, fur tui chauh rinchhana thlai chin hi kan khawpkham tawh lo va, englai pawha thlai tharchhuah theih a pawimawh tawh a, chuta tan chuan irrigation kan nei tha lo a, ruahtui khawlkhawm hmanga thlai chawm dan kan ngaihtuah hi tih makmawh a ni tawh a, rain water harvesting hi ngaih pawimawh em ema kan neih a hun ve ta hle a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy