Nimin khan Commercial Vehicle Union hruaitute chuan, kawngpui \ha tawk lo vanga harsatna an tawh thu chief minister Lalduhoma hnenah an thlen a, chief minister chuan ruahtui vanga harsatnate hriatthiamsak tur leh lo ngaichang hram turin a ngen. Commercial Vehicle Union hruaitute tuialhthei man sang chungchang te, lirthei kaihhnawih chhiah chungchang te, fitness test thu leh state dang atanga private car hmanga rinhlelhawm taka rawn vak vel an tam thu leh an ngaihpawimawh thil dangte chief minister hnenah hian an thlen a ni.
Chief Minister chuan, kuminah India ramin ruahtui kan dawng tha a, tuilian leh leimin a tam a. Chhiatna pawh kan tawk nasain kawngpui then fel nan pawh hian sum leh pai a kal tam hle a ni, a ti a. Hei hi kan tum anga hma kan lak chak theih loh chhan ber a ni, a ti bawk. Ruahtui vanga kan harsatna te min hriatthiamsaka min lo ngaichang hram hram turin kan ngen che u a ni, tiin Sawrkar hmalak dan te a lo hrilh a. Kawnpui leh Khamrang inkar chu remchang hmasa berah amah ngeiin tlawh a tum tih a sawi.
Chief minister hi Vanlalhlana, PWD leh Transport Minister, TBC Lalvenchhunga, Adviser to CM (Finance) leh PWD Official pawimawhten an tawiawm a ni.
Kawngpui leh a Behbawm
Tuna Mizoram chak lakna kawngpui chhe zual lai Kawnpui leh Khamrang inkar hi Satguru te thawh a ni a, maintenance period-ah a lut mek a, May 2026 thleng awh tur a ni. An maintenance period a nih avangin NHIDCL-in a laksak duh lova, tun hi a thleng ta a ni.
Sawrkarin an contract tihtawpsakin an maintenance fund awm ang ang hi vawiinah Mizoram PWD account-ah a luh beisei a ni a. Chung sum te leh state sumte nen chak taka umzui a ni.
Kawng chhiat vanga Sumo Service te an chawlhna zawng zawng hi Lung hnawha tlan theiha a rang lama siam tura an ngenna chu a theih chen chen bawhzui nghal a ni dawn a. Kawng chhia vanga Sumo Service chawlhnate a rang lama inhrilhhriat ni se, an ti.
Manipur chak lak luhna Kawlkulh leh Hliappui inkar kawng hi sawrkar chuan PMGSY 3 hnuaiah siam thar vek turin contractor thar kutah a hlan tawh a. Tuna lung hnawh nghal ngai leh lirthei tang nawrchhuaktu tur JCB pawh contractor hnena ngen tha an ti.