Sawrkarin rualban lohna hrang hrang neite tana hamthatna a ruahmanah rualbanlo zawng zawng huapzo leh a taka hman theih policy siam a nih theihnan Mizoram sawrkarah rawtna thlen an tum tih Mizoram Blind Society chuan an sawi.
Mizoram Blind Society (MBS) hian Thawhlehni khan annual general body meeting neih pahin rualbanlo, a bikin mitdelte tana puihna leh hamthatna awm theite zirhona an buatsaih a. All India Confederation of the Blind Delhi leh All India Bank Officers’ Confederation Mizoram State Unit nen tanghoa huaihawt a ni.
He hun hmanpuitu Persons with Disabilities commissioner Vanlaldiki Sailo chuan MBS hmalakna chu tha a tih thu sawiin, hmasawn zawnga tan laa theihtawp chhuah zel turin a fuih. Mizoramah rualbanlote tan hmasawnna tam tak awm tawh mah se, India ram state dangte khaikhin chuan hmalakna tur tam tak a awm tih a sawi.
Mizoram Blind Society hian PwD commissioner Vanlaldiki Sailo hi kum 1988-a sawrkar hna a thawh tan atanga vawin thlenga rualbanlote enkawlna kawnga hun puma missionary rilru pua rualbanlote hmangaihna tak tak nena thawktu a ni, tiin, chawimawina thuziak, Certificate of Appreciation an hlan a ni.
State Bank of India hotuten an hnuaia health insurance scheme leh mitdelte tana SBI-in facility a pek theih an hrilhfiah a ni.
MBS general body meeting thurel:
4Mizorama rualban lohna hrang hrang neite tana zirna, eizawnna leh hmasawnna scheme hrang hrangah Mizorama rualbanlo zawng zawng huapzo leh a taka hman theih policy siam a nih theihnan Mizoram sawrkara rawtna thlen a, hemi thila sawrkar thawhpui.
4Mitdel eizawnna mumal neih loh vanga khawlaia zai thinten the Rights of Persons with Disabilities Act 2016 Chapter 7 tlawhchhana Mizoram sawrkar atanga a bika hamthatna an hmuh theihnan sawrkara rawtna thlen leh bawihzui.
4Mizoram Blind Society member mitdel khawsak harsate tana Mizoram sawrkar leh bank kaltlanga health care facility mumal leh rintlak siamsak.
4Mizorama National Open School, IGNOU leh corresponding course-a mitdel zirlaiten study material awlsam leh mumal zawk an neih theihnana hma lak.