Ruang dahnaa dah tur dam chhuak leh!

Mi pakhat, a chhungte thi nia an hriat, damdawi ina tul dang tih zui ngaia an kalpui chu ruang dahna hmuna dah dawn laiin a dam leh.
North Kerala district-a thil thleng hi kum 67 mi, Pavithran-a niin Koothuparamba bul, Pachapoika-a mi a ni a, a lo dam leh ngawt hi a chhungte leh mi dang pawhin mak an ti a. A tuka vui an tum laiin hetiang hi an tawng ta a ni.
AKG Memorial Co-operative Hospital ruang dahna pawh a chhungten ruang dah lailawk nan an duh avangin tihvawh vek a ni tawh a ni.
A ruang hi ruang dahnaa an dah hma hretin hospital-a thawk hian a kutzungtang a che tih a hmu a, Pavithran-a chhungte leh doctor-te a hrilh ta vat a ni.
Hospital attendant Jayan chuan Pavithran-a kut che hi ruang dahna ina dah tura a buatsaih laiin a hmu a ni.
A la nung tih an hriat rual hian intensive care unit-ah dah luh nghal a ni tih damdawi in thuneitute chuan an sawi a. A chhungte chuan Pavithran-a hi hrisel lohna neuh neuh nei a ni a, a chuap leh lung fel lo a ni a, Mangaluru, Karnataka-a mi mal damdawi ina enkawl lai niin an sawi.
Ventilator nen chauh a awm tawh a, a chhungte chuan inenkawlna sum a hautak avang leh that chhuah a beiseiawm loh avangin an khuaa hawpui an tum rilruk tawh lai a ni.
Mangaluru-a doctor-te hian Pavithran-a hi ventilator tel lo chuan a dam thei tawh dawn lo va, minute 10 bak a daih tawh dawn lo niin an sawi.
Damdawi ina an dah hnuah pawh hian a mit pawh a meng tawh lo niin an sawi a, a blood pressure erawh a hniam hle niin a sawi.
A thi dawn hnai tihah a chhungte hian Mangaluru-a doctor-ten ventilator awm lohna ambulance pangngaiah chuan darkar nga bak a dam zo dawn lo niin an hrilh tih an sawi.
An haw kawngah hian Pavithran-a hi a che tawh lo va, nunna a la nei tih lanna engmah a awm tawh lo niin an sawi.
Pavithran-anupui leh a farnu chuan ambulance-ah hian an chuanpui a, a chhungte dangin car-in an zui.
Zanah chuan a ruang hi AKG Hospital-a ruang dahnaah dah zui a ni a, a tuk Thawhlehnia vui tur khan an ruahman a ni.
Hospital attendant hian Nilainiah a che tih a hmu a. Damdawi in thuneitute hian Nilaini thleng khan Pavithran-a hi ICU-ah la awmin enkawlna an pek pawh a thatpui nia an hriat thu an sawi.
“Miin an koh pawhin a mit a meng a ni,” an ti a. A dinhmun erawh a la hniam hle niin an sawi bawk.
Hetih lai hian tual chhung chanchinbute chuan Pavithran-a sunna hi Thawhlehni khan an lo chhuah hman a, an ina vui tura kal khawm pawh an awm hman bawk.