Site icon The Aizawl Post

Rubber chingtute tan hawng

Rubber chingtuten an tangkai pui tur, rubber hnai lakna hmanrua hrang hrang leh a hnai hralhna tur Aizawlah hawn thar a ni.
Rubber kaihhnawiha India rama buaipuitu ber Rubber Board of India executive director Dr KN Raghavan leh hotu dangte chuan heng thil hi an rawn hawng a. Thuthar thehdarhtute an kawmnaah Mizo mipui tan rubber chin kawngah hma nasa taka an lak thu Dr KN Raghavan hian sawiin, rubber chi an sem nual tawh thu a sawi a. Nursery-te siama hmalak chhunzawm zel an tum thu a sawi a, tun dinhmunah rubber hi kg khatah Rs.135 a ni mek a, a man hi sik leh sa dinhmun azirin kum khat chhung pawhin a danglam ve reng tih a sawi. An tum ber chu, rubber ching tawh sa te chhawmdawl a, a lianthama thar thei lo tan pawh hlawk taka an rubber hnai an hralh theihna tur ruahman sak a ni tih a sawi.
Rubber hi kum 7 hnuah a puitling tlangpui a, a puitlin hnuah chuan rah loh tum a nei lo tih sawiin Mizoram mipuite chu a chin theihna apianga ching vek turin Rubber Board hotu hian a sawm a ni.
Soil & Water Conservation director Hualthanga Chhakchhuak chuan thenawm state Tripura-in nasa takin rubber an hlawkpui tawh a; an chhak lawka awm Mizoten kan hlawkpui ve theih ngei an beisei a, rubber chin chu thla tina hlawkna tel theih a ni tih a sawi.
Nilaini vek khan Land Resorces Water & WC department buatsaihin rubber chingte leh a tuimite tan Rubber Board of India hotute nena inkawmna Aizawlah hian neih a ni a. He hun hmanpuitu LRS&WC minister R Lalzirliana chuan rubber leh a kaihhnawih thildang chu chu state economy siamtha theitu pawimawh a ni, tiin, Mizoram sawrkar pawhin Rubber & Allied Crops Development Board a din tawh thu leh project hrang hrang siamin hma an lak mek thu sawi.
Rubber chingtute harsatna thin Rubber Board of India-a thlen a nih hnuin, Rubber Board office leh a thawktu officer viak tha tak Mizoramah an rawn dah tih a sawi a. Mizoramah department tanpuinaa rubber huan siam chhungkua 3000 vel leh department puihna tel loa rubber ching thahnem tak an awm thu a sawi a ni.
Rubber plantation engemawzat hnai theih a nih tawh avangin, department hmalakna in nikum hmasa khan rubber herna khawl 100 sawrkarin a semchhuah thu te, Zau hrang hranga inhmantawm turin NABARD atanga Rubber Smoke House 50 sakna tur sum sem a nih thu te minister hian sawiin, heng khawl hi tangkai taka hman mek a nih thu a sawi bawk.

Exit mobile version