Chief minister Lalduhoma chuan Mizoram chu Rubber tharchhuahna hmunpuiah chantir an tum tih a sawi a; chumi atana inbuatsaihnan Chief Minister Rubber Missions din a ni, a ti.
He thu hi nimina Vanapa hall-a Rubber chingtute puala training buatsaih a hmanpuinaah chief minister hian a sawi a. “He missions hi mawlmang takin kan kalpui lova, Rubber Board of India te nena uluk taka kan sawiho hnu leh Tripura Rubber Missions kan zirchian hnua kan kalpui a ni, a ti bawk.
Training hi Land Resources, Soil & Water Conservation Department buatsaih a ni a, Mizoram Chief Minister’s Rubber Missions hnuaia rubber chingtute chu Rubber chin dan, a seng dan leh a seng hnua a sawngbawl zui dan leh a kung enkawl dan an zirtir a ni.
Chief minister chuan, “UT kan nih ata kum sawmnga kan pel tawh a, loneia eizawng kan tam chungin eng thlai mah hi ka hmingthanpui ngai lo. A thlan tla nasa, a kut durh nasa te hi kan rethei em em thin. Mipui sorkar kan han ding a, kan Policy te kan han tipuitling chhova, hun rei lo teah Ginger Capital of Indiaah min puang ta a ni. Sapthei pawh hi kan larpui theih, kan rama thlai tha duh tak a ni. Kan hmingthanpui theih thlai tha ber pakhat chu rubber hi a ni a. Kan ram hi Rubber tharchhuahna hmunpuia chantir tumin Chief Minister Rubber Missions kan duang chhuak ta a ni,” a ti.
“A tira kan ruahman aia nasain hma kan la thung a. A chhan pawh rubber ching duh kan tam vang a ni a, thil lawmawm lam a ni. In hlawhtlin ngei theih nan sorkar chuan a tih turte a ti zel dawn a, a chingtute pawhin theihtawp in chhuah hi kan beisei che u a ni. Ti ve mai mai tan hlawhchham theih a ni a, rubber la ching ngai lo tam takin in ching thar dawn bawk si a. A tih dan engkim hi in thiam a ngai a. He training hi tha takin in lo ngaithla dawn nia. Sorkarin in banah kan kai dawn che u a, kaihtlak ni ngei ang che u,” tiin a fuih a ni.
Lalthansanga, Minister LR, S&WC pawhin thusawiin, sorkar chuan tu mah thlei bik nei lovin hma a la a. Kan chief minister hi kuthnathawkte hmasawnna vei em em tu, amah ngei pawh huan siama hnathawk thin a ni a. Hei hi kuthnathawktuten kawng hrang hrangin an chhawr chho mek a ni, a ti.
Training-ah hian Rubber Board of India leh Servo Lubricants (IOCL) atanga mithiam lo kal ten Rubber chingtu mi 550 te hnenah Rubber chin dan leh enkawl zui dan te, Rubber hnai dan te, Rubber hnai sawngbawl dan te bakah Rubber kung tichhetu rannung laka ven dan te zirtirna an pe ang.
Mizoram leh Rubber
Mizoramah hian rubber chin theihna ram Hectares 50,000 vel a awm a, rubber hi thlai nghet, ramngaw siam thei thlai, tuihna humhalh kawnga tangkai, a hralhna tha tak, a hnai theih tawh loh hnua Thingzai atana hman zui theih ni si a nih avangin Mizoram Sorkar chuan uar zawka kalpui a tum.
Ni 18th October 2024 khan Chief Minister’s Rubber Mission din a ni a, he mission hnuaiah hian Land Resources, Soil and Water Conservation Department chuan kum 2025 kum tir atang khan hma la tanin, Mamit District leh Kolasib District chhunga ram 1000 hectare a zauah Rubber tiak kung 4,50,000 phun a ni tawh a, kum 2026 hian District hrang hrang pariata ram 2,575 hectare a zauvah Rubber tiak kung 11,58,750 phun chhuah leh vek tum a ni. Kum nga chhung kalpui tura duan niin, ram 11,500 hectare a zauah Rubber phun khah vek tum a ni.
Rubber chinna hmunte hi kawng sialsak an ni ang a, Rubber Roller Machine leh a hnaina hmanrua ngaihtuahsak an ni ang a, a hralhna pawh ngaihtuahpui an ni bawk ang. Kumin bikah hian rubber chinna hmun sawm leh pakhatah huan panna kawngpui kilometers 46.50 laih hman tum a ni.
“Farmers Training on Scientific Rubber Cultivation, Harvesting Techniques, Post-Harvest Handling and Pest Management” hi Lunglei, Hnahthial, Lawngtlai leh Siaha District chhunga Rubber chingtute tan hun remchang hmasa berah buatsaih leh tum a ni.
Rubber hmunpui nih tumin CM Rubber Mission kan din: Duhoma
