Rui chunga lirthei khalhtu lakah Traffic Police an khauh dawn

Rui chunga lirthei khalhtu lakah
Traffic Police an khauh dawn
Rui chunga lirthei khalh chu danin a ngaih thutak avangin, khauh taka dan hi kenkawh a ni dawn tih senior SP Traffic chuan a sawi.
Senior SP Traffic hian mipui hriattirna tichhuakin, rui chunga lirthei khalh hi danin a ngai thutak a. A hremna pawh section 185 The Motor Vehicle (Amendment) Act 2019 sawi angin Rs. 10000 chawi emaw thla ruk (a vawikhatna)/ bawhchhiat nawnin kum hnih) thleng lung ina tan emawa hrem theih a ni. Section 6 (3) The Mizoram Liquor (Prohibition) Act 2019 sawi angin, kum hnih thleng lung in tan emaw Rs 10000 thleng chawi emawa hrem theih a ni bawk.
Supreme Court Committee on Road Safety chuan state leh UT te hnenah thupek siamin, rui chunga lirthei khalhte reng reng an driving license thla thum aia tlemlo suspend turin a hriattir tih pawh sawiin, ‘Rui chunga lirthei khalh hi a khalhtu bakah lirtheia chuang ve midangte tan a him loa; kawngpui hmangtu mipui tan a him lo takzet a ni. Hei vang hian lirthei khalhtu reng reng rui chunga lirthei khalh lo turin kan inhriattir a. Rui chunga lirthei khalh man an awm chuan dan angin na takin an chungah hma lak a ni anga, sum chawitir leh an driving license cancel tura hma lak zel a ni ang. A tul dan azirin Court-ah pawh inthawn zel a ni ang,’ a ti.
Mipui pawhin rui chunga lirthei khalhte Traffic Station-ah emaw a hnai ber Police Station-ah emaw report zel tura ngen an ni tih SP Traffic hian a sawi.