BTS member Suga chu rui chunga scooter a khalh avangin police ten manin, a driving license suspend sak a ni a, he thil thleng avang hian Suga pawhin thupha chawina tum hnih a tichhuak tawh a, tunah a hremna an puang ta a, pawisa chawitir a ni.
August thlaa thil thleng tawh kha a ni a, Suga hian zu nam chungin electric scooter a khalh a, police ten manin a in-ham tling ve tlat mai a, he thil thleng hian sawi zui a hlawh hle a, South Korean news agency Yonhap chuan niminpiah khan Suga hi a chungthu rel zui lovin pawisa chawitir a nih thu an puang ta a ni. Suga hian a license suspend a nih thu a hmain a lo puang tawh bawk.
August ni 6 khan Yongsan district-a Hannam khuaah Suga, kum 31, hi electric scooter-in a tlu a, chu chu police ten an han enfiah a, zu rim a namin an hria a, thu te an zawhfiah hnuah an test a, a tisena zu (alcohol) awm zat chu 0.227 % a ni a, hei hi lirthei khalh tura zu in phal chin aiin a let thum dawnin a sang zawk a ni. An rama Road Traffic Act-ah chuan rui chunga lirthei khalh hi thiam loh chantir an nih chuan kum hnih atanga kum nga thleng jail tang tura hrem theih an nih bakah South Korean pawisa won maktaduai 10 atanga maktaduai 20 (dollar 7,442 atanga 14,884) thleng chawitir theih an ni bawk.
Rui chunga scooter khalh vangin Suga pawisa an chawitir
