Daily Newspaper

RÛI LA, I NGAM CHUAN!

15

– Zoremi Hmar Zote

Khawvel changkannain a ken tel, internet leh social media-in kan tapchhak zâwl thlenga mi luh hnu-ah, mi lian fate leh michhe fate min hrût kim vek a. Zofate zingah rilru piangsual, rual ban lutuk vanga rethei ta te, mita kan hmuh khawvel ram hrang hranga milârte leh mihausate incheina, lirthei leh thil hrang hrang kan duh ve zel si avanga tunge ka nih, tu fa nge ka nih a, thlakhatah sum engzat nge kan chhungkuain kan lakluh a, kei hian eng nge ka thawh chhuah tih min theihnghilhtir thak khawpa piansualna runthlâkin min suasam mêk lai kârah, ruihhloin Mizo thalai min suasam dan hi a râpthlâk zual.

Zu kan han zuar a, khawvel zu zuar zawng zawngah kan rui thiam lo ber phawt! Kum khatah mipa, tlangval leh pavalai veng tinin kan tuh(phûm)zung zung a. Nuar thut se sawrkar nghawr dawt tham hmeithâi kan awm tawh. Nu, la naupang ve tak tak te’n pa tel lovin an fate an enkawl a, nu ber pawh hmangaih leh dimdawi taka enkawl ngai ni chung khan amahin a fate a enkawl a ni a. An hmangaih em em an fate, Zu vanga fahrah lo ni ta te lainat vanga an tah tlaivar châng a va tam dawn rua êm!

PATE U…
In pai lai atanga in hmangaih, nau duhawm taka a lo pian theih nan ti a, neihthinglung khawnga damdawi tha tinrenga in enkawl in fate kha an lo piang a. Nuin duat takin kan chawi lian a. thian pâwl rual an rawn ni chho a, a thiante zingah chhuang takin “Âpa” tiin i chanchin a sawi thin. A duh zawng leh ît zawng a hmu a, “Âpain min lei ve dawn” a ti mai a. A hlauh zawng a tawn pawhin, “Âpain a ngam” a ti. Khawvela huai ber, thil tithei leh engkim nei anga ngaitu che leh, ngaisang em emtu che kha, he khawvelah hian i fa chiah kha a ni. I va ropui êm!

Khawvel hrehawma harsatna leh hrehawm tinreng amah chauhva pal tlang a, a mangan tâwp pawha inphenna tur, inhumhimna tur PA nei lova khawvela i hnutchhiah duh a nih chuan, rui zel la, in in hlum vat rawh, i ngam phawt chuan!

THALAITE U!
Zu ngawl in vei châk em? Drug addict tih hming hi changkangin in hria em? Tuna kan thalaite in ruih suau suau a, in sakruanga lâitha zâm an chuai a, mianglo mai in nih sup sup mai chuan, kan hnam aia fing hret hnam dangin kan kawtchhuah zawl mai ni lo, kan rappuichungsâng thlengin an rawn chuan vat dawn! Kan nula hmeltha tak tak te’n hreh chung chungin hnamdang an ûm ang a, kal thle hu hu, meng â ruai mai leh bu chhuih chhuih nupui nih duh lovin an chal an la hnawih sen fur anga ti nia!

Inhrethiam tawn taka rui thei leh rui thei, addict ve ve inneite hma lam hun phei chu ngaihtuah ngam chi pawh a ni lo. Barakhaih thuta thi mai thei hmêl pu nupa châurâu fa sên pawisawi lo lu lawk lil lel kha, puakpuan ung zetin in paw thle ngûih ngûih ang a, in dam rei lo chhungkua dawn em em lehnghal!
Ram tana nun hlàn an zahawm a, thian chhan thih ngam Mizo tlangvalin chawimawina nopui a dawm thin. Kan ram neihchhun, kan hnam neihchhun, ralmuang leh him dam tak anga a lan lai a, thisen chhuah lova musepa min phuh hlum zawih zawihtu damdawi ruihhlo hian mi run thin. I nu leh pa innghahna, kan nulate thlamuanna, kan ram hnukpui hrual vuantu thalaite u, sa leh râl hmaa zâm ngai lo thlah kan ni a. Midang thawh chhuah sa ringa zawmthaw ngai lo thisen kan la ni reng. Kan neihchhun ram leh hnam hi khawilai vai mahin a rawn hmangaih dawn lo va, khawi ram mahin siam that tumin tha leh zung a rawn sêng lovang. An rawn inrawlh tur pawh a ni lo; kan ta a nih hi!

In chhûng atangin!
Bul tan that kan mamawh e. Hetiang nun nei lo tura kan fate kan duh chuan, nu leh pain Pathian kaihhruai chhungkua kan din a, kristian chhungkua ni ngawt lo deuh, Pathian thlarau thianghlim hruai theih chhungkua kan din a pawimawh ta. Thil tha kan hre vek, fate zilhna hun tur, chhungkuaa titi ho na hun turah te hian Phone khâl liam mai mai lo ila, kan hma lam hun tur kan fate khâl tam zawk teh ang u. An kianga awm tam a, an thusawi ngaihthlâk leh, an chinchâng, an rilru put hmang hriatpui vek hi thil pawimawh ber a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy