Ruihhlo leh a kaihhnawih hrang hrang laka India ram a fihlim theihna’na sawrkar laipui Ministry of Social Justice & Empowerment leh Mizoram State Social Defence & Rehabilitation Board tangdun hnuaia National Action Plan for Drug Demand Reduction hmalakna, ‘Nasha Mukh Bharat- Drug Free India Campaign’ kalpuitu District Level Nasha Mukt Bharat Abhiyaan (NMBA) Committee, undivided Champhai District chu Thawhlehni khan an chairman, district bawrhsap James Lalrinchhana hoin an thukhawm.
NMBA Champhai District chairman chuan India ram puma drugs hluarna district 372 zinga ruihhlo do beihpui thlak kawnga hmalakna tura thlan zingah undivided Champhai district a tel thu sawiin, NMBA chu hemi kawnga hma la tura din line department hrang hrangte telna a ni a, inpawhtlang taka thawhho a pawimawh tih a sawi.
Hnathawk rual thalai tam tak ruihhloin a tibuai leh hnathawk tlak loa a chhuah chu veiawm a tih thu sawiin, ruihhlo do kawnga theihtawp chhuah tlan a tul tih a sawi bawk.
Thutkhawm hmasa 2022 December 19-a thurel bawhzui a nih dan report a ni a. Nasha Mukh Bharat Campaign kaltlanga kumin chhunga Champhai district-a hmalakna tur duante zirho niin, hma lak mekna leh thla tina hmalakna kalpui turte sawiho a ni. Ruihhlo ngai enkawl leh chhawmdawlna pek ngai bikte buaipui dan turte sawi a ni a. Zirna in leh hmunhma danga awareness campaign neih nan tun thla chhungin ruahmanna duan fel nise tih a ni. Zirna in bul metre 100 huamchhunga vaihlo leh a kaihhnawih zuarte Anti Tobacco Squad ten dapchhuah hna kalpui thin se an ti bawk.
NMBA – Drug Free India Campaign hnuaiah hian India rama district 272 ah ruihhlo do hmalakna kalpui a ni a. Nikum August khan district 100 dang telh belh a ni. Aizawl, Kolasib leh Champhai district chu Mizoram atanga campaign kalpuina niin, Narcotics Control Bureau leh Ministry of SJ&E kaltlanga national survey neihin drugs hluarna district nia a tarlan zulzuia thlan an ni.