Ruihhlo do kawngzawh runpui Aizawlah nei

Working Committee on Ruihhlo Do buatsaihin Nilaini khan Aizawlah Ruihhlo Do Kawng Zawhpui neih a ni a. Zirlaite leh tlawmngai pawl aiawhte an tel.
Kawngzawhpui hi thuang hniha neih niin, Millenium Centre kawt leh Sikulpuikawn atangin Raj Bhava Northern Gate pan a ni a. Ruihhlo chu kan ram hmelma a nih thu leh ruihhlo tel loa kan hlim theih thu te, ruihhlo zuartute chu ram leh hnam hmelma an nih thu leh ruihhlo tel loa ram nuam siam tura tanrual a pawimawh thu bakah ruihhlo man chhuah kawngah sawrkar tawiawm a pawimawh thute an aupui a. Ruihhlo leh a kaihhnawih laka inhnamhnawih loa, ruihhlo do kawnga theihtawp chhuah turin thutiam an la bawk.Gate-a hun hmanah Social Welfare & Tribal Affairs minister Er Lalrinawma chuan Ruihhlo Do Kawng Zawhpui buatsaiha thalai tam tak an tel thei leh ruihhlo do kawnga hmalaknain thlawpna tha tak a dawng chu ropui a tih thu a sawi a. Ruihhloin min run mek karah sawrkarin theihtawp a chhuah a; state, district leh village level thlenga awmze nei zawka hma lak a nih theih nan ruahmanna siam a ni, tiin, mipui chu ram leh hnam chhanna tur a ni tih hriaa a hlawhtlin theih nan tanpuitu leh tawiawmtu nih tum turin a sawm.
Excise & Narcotics minister ni bawk Er Lalrinawma chuan ruihhlo leh a kaihhnawihte do kawngah sawrkar leh YMA bakah NGO dang leh kohhran ten theihtawp an chhuah thin chu lawmawm a tih a sawi a. Thahnemngai taka ke pen zel turin a chah. Nunna hlu tak chhan nan ruihhlo dolet a tul tih sawiin, “Pathianin taksa tha tak min pek hi ruihhlo leh a kaihhnawih lakah kan venghim tur a ni,” a ti.
Raj Bhavan Northern