Rev. Dr. Zaichhâwna Hlâwndo
Kan thupui ‘Ruihhlo do’ tih hi Zofate tân chuan thu lâr leh lang sâr, tute pawhin kan hriat lâr tak a ni. Ruihhlo hi kan ram leh hnam hmelma lian ber a ni tih loh rual a nilo. Chhûngtin deuhthaw hi min luhchilh a, kan taksâ, rilru leh thlarâu hi min hliam chauh pawh a nilo, min suat a ni deuh ber mai. Hetiang taka ruihhlovin min tihbuai avang hian Mizoram Sawrkar, Kohhran, YMA leh MZP pawhin vawi duailo “Ruihhlo do’ hi puangin kan lo kalpui tawh thin. Ruihhlo do hi kan duh emaw duhlo emaw tihmâkmawh kan kova lo tla a ni. Economic Survey of Mizoram 2024 in a tarlan danin Excise & Narcotics Department chuan ruihhlo do hmalakna atangin hetiang hian ruihhlo an man-(1) Heroin 27.96 kilogram, (2) Methamphetamine -34.19 kilogram (3) Ganja 190.77 kilogram leh (4) Zu chi hrang hrang 45,000 litres lai an man (Source : planning.mizoram.gov.in). Kum 2025 chhûng khan damdawi ( drug) kaihhnawih avangin mi 118 an thi a, kum 20 chhunga ruihhlo avanga thi chhinchhiah tam ber a ni.
CYMA chuan kum 2025 kum puanah ‘ruihhlo do’ a pawm a. Ruihhlo hman hlauhawmzia mipui hnenah te hriattirin rehabilitation lama thawktute pawh a tanpui a. Drug traffickers leh ruihhlo zawrhte doin Police leh Excise & Narcotics Department nen pawh an thawk ho bawk.YMA Branch hrang hrangte hmangin khawtlang-ah in hrilh-hriatna (awareness campaign) leh a taka beihpui (enforcement) hna a kalpui tawh bawk.
‘Ruihhlo do’ tih thu kan sawi dawn avangin ruihhlo kan lo do tawh dan te kha a tha tawk em? Ruihhlo kan do dan koki te hi thlak a ngai em? Engtinnge chak zawk, hlawk zawk leh awmze nei zawka kan do ang tih ngun taka kan ngaihtuah a ngai. Chuvang chuan ‘ruihhlo do’ tura kan hriat chian hmasak atana pawimawh ka tihte chu :-(1) Ruih hlo kan tih ber hi engtenge tih hriat hmasak a ngai (2) Ruihhlo chu eng vanginnge do a ngaih? (3) Ruihhlo chu engtia do tur nge ni ang? (4) Ruihhlo do chu tu mawhphurhna nge ni a tuin nge do ta ang? tih leh (5) Ruihlo chu do rem emaw do hlawhtlin theih a ni angem? tihte hi an ni.
A hmasa berin Zofaten “ruihhlo” kan tih chu mihring rilru, thlûak leh taksa tihdanglamtu thil hrang hrang, ruih theihna leh mihring a chhiatna thlen theite sawi nân hman a ni.Chung ‘ruihhlo’ kan tihte chuan hengte hi a huam thei- (1)Zu (alcohol) (2) Ganja (cannabis), (3)Opium, (4) Heroin, (5) Cocaine leh (6) Methamphetamine (yaba/crystal meth) te hi an ni. Heng bakah hian ruihhlo nive tho beihpui thlaka do ngai lutuk lova kan ngaihte chu – (1)Tobacco (vaihlo zial), (2) Khaini,(3) Sahdah (4)Kuhva leh (5) Tuibur te hi an ni.
A dawtah chuan engvanginnge chung ruihhlo te chu do an ngaih tih hi kan hriat a ngai. Ruihhlo do a ngaihna chhan chu mihring taksa, rilru leh thlarau thleng tichhia a, tihllum thei an nih vang a ni. Ruihhlo chuan a titu nun chauh nilovin, a chenpui chhungkua, thian, khawtlang leh ram thlenga buaina, chhiatna leh thihna thlen theitu an nih avangin kan do a ngai. A point tawp berah chuan Zofate chu Kristian kan ni a, kan awmdan tur, kan tih leh tih loh tur kan hriattheihna chu Bible (Pathian Lehkhabu) hi a ni. Bible chuan kan taksa hi Pathian biak in (1 Korinth 6:19-20) a ni tih min hrilh a. Ruihhlo chu Pathian biak in tibawlhhlawhtu leh tichhetu a nih avangin kan do a ngai. 1Korinth 6:9–10 ah chuan Ruihhlo hmangte (drunkards) chuan Pathian ramah rochân an neihloh tur thu kan hmu. Galatian 5:19–21 ah chuan ruihhlo hi tisa thiltih zînga pakhat a ni a, chutiang mite chuan Pathian ramah rochân an neih loh tur thu kan hmu bawk. Chuvang chuan kan taksa leh rilru mai nilovin kan thlarau boralna kawnga min hruaitu a nih avangin kan do ngei ngei a ngai a ni.
A pathumna ah chuan ruihhlo chu engtia do tur nge tih kan hriat a ngai. Do dan tura tan kan lakna hmasa ber atan chuan ruihhlo thatlohna leh hlauhawm zia -mimal, chhungkua, pawl, kohhran leh social media ah a tam thei ang bera puanzâr leh in zirtir a ngai. A dawtah chuan ruihhlo zawrh leh hralh phallohna dan tha leh khauh tak siam a ngai. A pathumna ah chuan ruihhlo timite thununna leh hremna dan tha leh mumal tak kan siam a ngai. A point hnuhnung ber leh pawimawh bera ruihhlo do dan tur chu Pathian Thlarau Thianghlim a khah (Ephesi 5:18) leh Pathian ralthuam famkima inthuam ( Ephesi 6:11) a ni. Pathian chakna leh thiltihtheihna tello chuan ruihhlo hi do hneh a har tak zet a ni.
A palina ah chuan tuinnge ruihhlo chu do ang tih hi hriat a pawimawh. A chhanna chu mitinin do vek tur a ni tih hi a ni. Zofate zingah hian ruihhlo ti tur bik leh a do bik tur ruat kan awm hranpa lo. Ruihhlo chu mitin hmelma hlauhawm ber a nih avangin mitinin kan do tur a ni. Mitinin ruihhlo kan dona leh kan tan rualna hmasa ber tur chu chhungkuaah a ni. Ruihhlo reng reng kan in chhungah ti kan awm tur a ni lova tuman kan la lût tur a nilo ti ngam ila kan do rem hma ber ang tih a rinawm.
A tawp berah chuan ruihhlo hi do rem vek emaw do hlawhtlin theih a ni angem tih hi kan ngaihtuah a ngai. Ruihhlo hi Pathianin mihring a siamten an bawhchhiat hnu atang khan tun thlengin a la awm. Pathianin lei thar a din a, mihring thar a din hma chuan do rem vek theih a nih chu a rinawm lo. Amaherawhchu kan do rêm vek dawn loh avanga thlah zalen tur tihna chu a ni lo. Bible chuan sual dovin thisen chhuak khawpa tan la turin min zirtir (Hebrai 12:8). Ruihhlo hi kan do rem veklo a nih pawhin kan do hlawhtling tawh thin a, kan hlawhtling mêk a, kan la hlawhtling zêl ang. Mihringte hmelma chauh pawh nilo, Pathian hmelma ruihhlo hi zalenna pek chi a nilova, sual chu do tur a nih tlat avangin ruihhlo hi i do chhunzawm zel ang u.