Serchhip District Secondary School Sports Meet 2024 hawngtu chief minister Lalduhoma chuan zirlai pungkhawmte chu ruihhlo laka fimhlim a, nun kawng pangngai tak zawh turin a chah.
Thawhlehni khan district hrang hrangah Secondary School Sports Meet 2024 tan a ni a, Serchhipah pawh bialtu MLA, chief minister hoin hawn a ni. Serchhip district-in tunhnaiah infiamna lamah hma a sawn nasa tih sawiin, badminton, football, boxing, Taekwondo leh discipline thenkhatah India rama lang phak an nei nual chu lawmawm a tih thu a sawi.
Sawrkar hnaah kan vaia luhna tur a awm loh avangin kawng danga talent tha tak tak tipung a, bei zel turin zirlaite a fuih a. Talent hai chhuah kawngah tan la zel turin a chah.
“Kan thalaite hi sawrkar chuan a thlahthlam ngai dawn lo a, infiamna hmunhma pawh a theih ang angin kan thuam tha chho dawn,” Lalduhoma hian a ti. Serchhip Sports Complex chu mi inphalten infiamna hmun atana an pek a ni a, an pek ang takin infiamna ruhrel tha tak tak sak nan an hmang dawn tih a sawi.
Infiamna mipa tan chi 19 leh hmeichhe tan chi 17 a awm dawn a, school 19 atangin infiammi 600 vel an fuankhawm. Zirlai kalkhawm zawng zawng hi an vaiin 1000 vel an ni.
Ruihhlo laka fihlim turin CM-in chah
