BJP Mizoram chuan dan loa Mizorama ruihhlo leh smuggling thil dang tawlh thin chu titawp turin ZPM kaihhruai sawrkar an phut tih an sawi.
BJP Mizoram Pradesh hian July 11 khan Extended Executive Meeting an nei a. Political & economic resolution-a thu an pass zingah – Mizorama ruihhlo hluar ta em em avanga nitin deuhthawa thalai nunna an chan zawih zawih chu pawi an ti a. Smuggling leh ruihhlo hmanga sumdawnna in zual lam a pan zel chu state sawrkarin a tih tur a tih loh vang a ni, tiin, mipui vaubet zawng leh sum hmuhna tur ringawt buaipui loin, smuggling leh ruihhlo zalenna state-a Mizoram chang mek chu titawp turin an phut tih a sawi.
BJP kaihhruai NDA sawrkarin hnam leh sakhua tlem zawkte enhrang loa, duhsak taka MP pawh ni lo, Union minister atan Kristian pa, George Kurian a dah chu lawmawm a tih thu sawini, BJP kaihhruai sawrkar hnuaia mi zawng zawng kan len zia leh secularism chawinungtu a nih zia tih lanna a ni tih a sawi.
Mizorama political party leh pawl thenkhatten BJP chu Kristiante hmelma leh sakawlh ang hiala sawi a, dawt hmanga mipui an zirtir thin chu mipuiin thudik an hre chho zel a, Mizorama inthlan tinah BJP vote duhtu leh BJP vote share-in nasa takin hma a sawn a ni, tiin, mipui chungah lawmthu an sawi a ni.
BJP resolution dang:
* Mizoramah thalaite ‘employment generate’ theihna tur, thalaite eizawnna hna siam sak thei tur, environment friendly industry mumal tak state sawrkarin din thuai rawh se.
* CBI koh luh chungchang hi politics khelhna atan chauha hmang loin, state sawrkar hian corruption nuaibo a, tih tawp a duh takzet chuan CBI hi full fledged-in general consent pe rawh se
* Mizorama sawrkar kan hrawn tawhten inthlan dawn apianga power intodelh tura hna an thawh tur thu min tiam thin hi a taka ti an la awm loh avanga power indaih lohna kan tawh mek sutkian a nih theih nan, tuna state sawrkar hian a takin hma la rawh se.
* Mizoramah state sawrkar ten an tih tur an tih tawk loh avanga khuarel chhiatna anga ngaih theih thleng hi pawi kan ti a. Khuarel chhiatna pangngai tuar mekte chhawmdawl kawngah pawh Mizoram sawrkarin a tih tur a ti tawk lo hle ah kan ngai. Khuarel chhiatna tawkte chhawmdawlna sum a rang thei anga pe a, instalment-a pe loa, an chan tur ang pe chhuak zel turin kan phut a ni.
* Sawrkar laipuiin Mizoram mipui hmasawnna ‘road and infrastructure’ atana hma a lakna tawiawm tha lo leh state sawrkarin a tih tur a tih loh avanga mipuiin hmasawnna kan dawn tur kan dawn theih lohna tih tawp a nih theih nan Pu Lalduhoma sawrkar hian a rang thei ang bera hma la a, state hmasawnna tikhaihlak zawnga harsatna siamtute chungah na taka action la a, kawngpui tha kan neihna atana kan harsatna tawh mek forest clearance chungchang pawh a rang thei ang bera chingfel turin kan phut.