Vanduaithlak takin Mizoramah ruihhlo a hluar a, ruihhlo vanga nunna chan hial an awm; Mizoram Excise & Narcotics (MEN) department-in an chhinchhiah danin, kuminah mi 51-in ruihhlo vangin nunna an chan tawh.
Kuminah August ni 8 thleng khan mipa 44 leh hmeichhia pasarihin ruihhlo vangin nunna an chan tawh tiin an chhinchhiah a, a naupang ber chu kum 19 mi, a upa ber chu kum 57 mi a ni.
An chhinchhiah danin, mi 51-te zinga mi 12 chu heroin vanga nunna chan an ni a, mi 36 chu heroin leh ruihhlo chi dang vanga vanduai niin, ruihhlo chi hrang hrang vanga nunna chan pahnih an awm a, pakhat chu eng ruihhlo vanga vanduai nge a nih hriat a ni lo.
July ni 18 thleng khan ruihhlo vanga nunna chan zat hi 38 tiin an chhinchhiah a, chumi hnu ni 20 vel lekah 51-ah a pung hman.
MEN department chhinchhiahna enin, nikum khan mi 67-in ruihhlo vangin nunna an chan a, 2023-ah mi 76-in, 2022-ah mi 43-in nunna an chan.
1984 atangin ruihhlo vanga nunna chan zat hi an chhinchhiah a, 2025 August ni 8 thlengin mi 1930, mipa 1697 leh hmeichhia 233-in nunna an chan tawh.
Ruihhlo hi a hluar mek a, tun hnaiah khawlaiah ruihhlo sulhnu a lang nasa zual emaw tih tur a ni. Aizawl chauh ni lovin Mizoram hmun hrang hrangah ruihhlo hi a hluar mek. Ruihhlo-ah pawh heroin a hluar a, 1984 hnuah heroin vanga nunna chan mi 284 an awm tawh.
Ruihhlo vangin mi 51-in nunna chan tawh
