Ruihhlovin kawng hrang hrangin Mizoram a tibuai a, nunna chan phah pawh an awm thin. Kum liam taah pawh khan ruihhlo vangin mi 67-in nunna hlu tak an chan.
Mizoram Excise & Narcotics (MEN) department-in an chhinchhiah danin, 2024-ah khan Mizoramah mipa 58 leh hmeichhia pakuain nunna an chan a ni.
Ruihhlovah heroin chu nunna la nasa ber a ni a, mi 67-te zinga 39 chu heroin vanga nunna chan an ni. Mi dang vanduainaah pawh heroin a tel deuh zel; mi 28-te chu heroin leh damdawi ruihhlo dang vanga nunna chan an ni a, pakhat chu alprazolam leh damdawi ruihhlo dang vang, pakhat chu ganja vang, pakhat dang chu tablet chi khat vanga nunna chan an ni.
2024-a ruihhlo vanga nunna chante hi kum 19 leh kum 52 inkar an ni.
Kum hmasa 2023-ah khan ruihhlo vanga nunna chan zat hi 76 a ni a, 2020-ah khan ruihhlo vanga nunna chan zat hi 67 bawk niin, 2020 leh 2024 te hi 2023 tih lohvah 2005 hnua ruihhlo vanga nunna chan an tam ber kum a ni.
MEN department hian 1984 atangin ruihhlo vanga nunna chan zat hi an chhinchhiah thin a, 1984-2024 chhungin Mizoramah mi 1879-in ruihhlo vangin nunna an chan tawh tiin an chhinchhiah. Hemi hun chhunga ruihhlo vanga nunna chante hi mipa 1653 leh hmeichhia 226 an ni.
Tun hnai kum 10
chhunga ruihhlo
vanga nunna chan zat
2015-ah 27
2016-ah 59
2017-ah 65
2018-ah 56
2019-ah 55
2020-ah 67
2021-ah 47
2022-ah 43
2023-ah 76
2024-ah 67
Ruihhlo vangin mi 67-in nunna chan
