Ruihhloa an tlan hmaa infiamna lama
thalai tam zawk kan kaltir theih a ngai
– Vanlalhlana
Mizo thalaite ruihhlo bawiha an tan hma in infiamna lamah a tam zawk kan kal theih a tul hle tih minister Vanlalhlana chuan a sawi.
Inrinnia Durtlang North-a Multipurpose Indoor Hall sak thar a hawnnaah Aizawl North-I bialtu MLA, minister Vanlalhlana chuan, sports lama Mizo thalai tam zawk kan kaltir theih chuan ruihhlo bawiha an tan hma in kawng tha zawk an zawh theih a beisei tih a sawi a. Multipurpose Indoor Hall an neih theihna tura Sports & Youth Services minister leh department-a thawktute hmalakna fakawm a tih thu a sawi a. Thalaite tan sawrkar inpekna leh talent nei thate chher chhuah a tumna a lantir a ni, tiin, he Hall hi Mizo thalaite international leh national level inelnaa tel phak khawpa chhertu a nih theih nan duhsakna a hlan tih a sawi. Hall panna kawng pawh siamthat a ni dawn tih a sawi bawk.
Sports minister Lalnghinglova Hmar pawhin, he hall hmangtu mipuiin neitu rilru pua fai taka an vawn a, tha taka an enkawl a beisei tih a sawi a. ‘Multipurpose’ tih hming pu zoa he hall hi infiamna chi hrang hrang atan hman a nih ngei a duh tih sawiin, national leh international level-a medal dawng pha infiammi chher chhuaktu ni turin a duh tih a sawi.
Multipurpose Indoor Hall hi sawrkar laipui Ministry of Youth Affairs & Sports hnuaia Khelo India Scheme atanga sak a ni a, a project atana sum ruahman hi nuai 450 niin, 2023 November 21 khan administrative approval hmuh a ni a, a sakna hmun tur chungchangah Durtlang North Local Council nen indawrin, khawtlang leh sports hmasawnna atan tiin phal takin Mizoram State Sports Council kutah land lease an hlan a. Hnathawktu atan tender chhuah a ni a, Lushai Engineers, Ramhlun Aizawl thlan a ni. 2024 March 18-ah hna thawh tan niin, kumin February 23 khan zawh fel a ni.
He Multipurpose Indoor Hall hi a dung metre 46 niin, a vang metre 20 a ni a, hall san zawng hi metre 9, a chung sang lai ber metre 12 a ni. A chung khuhna atan steel structure roof truss leh DYNA roof hman a ni a. A sir tawn tawnah hian mi 200 vel thut theihna tur spectator gallery leh VIP gallery siam a ni. Gallery hnuaiah hian players’ changing room pahnih, official room, VIP rest room, medical room leh store room bakah mipa tan inthiarna pathum leh zunna atan chauha hman theih pali dang awmin, hmeichhe tan pali siam a ni bawk.
Indoor sports discipline hrang hrang hman theih turin a chhuat pawh mm 7-a chhah PVC Vinyl sports flooring phah chhuah vek a ni a. Volleyball net pole leh net dah tel a ni a, building hmalam tualzawl pawh PCC flooring-a siam a ni. Hall enkawl zui tur hian Management Board din a ni.
Ruihhloa an tlan hmaa infiamna lama thalai tam zawk kan kaltir theih a ngai – Vanlalhlana
