Tunhnaiah ruihna atana hman chi damdawi, dan loa an zawrh chhuah avangin damdawi zuar 12 chu drug license cancel sak an ni a. Suspend mek 12 tho an awm bawk.
Health & Family Welfare Department hnuaia Food & Drugs Administration chhinchhiah danin, kumin June thleng hian Mizoramah dan anga damdawi zawrh (general retail) phalna nei mi 981 an awm mek a, heng zinga 764 chu Aizawl ami an ni a, a dang 217 hi hmun dang ami an ni. Restricted retail 2704 zinga 1092 chu Aizawl ami, 1612 chu hmundang ami an ni a; wholesale-a pechhuak thei 417 zinga 362 chu Aizawl ami niin, a dang 55 hi hmun dang ami an ni.
Ruihna atana hmansual theih damdawi, dan ang ni loa pek thinah FDA chuan show cause notice a pe thin a. Kum kalta (2025- 2026) chhung khan hetiang avanga an drugs license cancel sak 10 leh suspend mek 8 an awm a; kumin bikah cancel sak 2 leh suspend mek 4 an awm.
FDA hian drug sector leh food sector atangin April 2025 – March 2026 chhung khan revenue Rs. 27,66,250 a hmu a; kumin April – June chhung hian Rs. 7,38,200 an hmu.
Health & Family Welfare Department hnuaia drug license, cosmetic license leh medical device registration hrang hrang pek chhuahna tur National Digital Platform – Online National Drug Licensing System (ONDLS) leh FDA Integrated Reporting & Monitoring System (FIRMS) Mizorama hman theih turin Health minister Lalrinpuii chuan Zirtawpni khan a tlangzarh a. He portal hian ‘ease of doing business’ kawngah a puih a beisei tih sawiin, Mizoram chu ram pumah ‘most digitized state’ ni turin chief minister-in hma a la nasa a, an department pawhin online-in hna a kalpui nasa a; he portal hi mipui leh thawktuten tangkai taka an hman theihnan sawrkar, pharmacist leh druggist an thawhho that a pawimawh dawn tih a sawi a ni.
8 Online National Drug Licensing System (ONDLS) hi Ministry of Health & Family Welfare-in Digital India Vision tihhlawhtlinna tura a kalpui a ni a. Central Drugs Standard Control Organization (CDSCO) leh Centre for Development of Advanced Computing tangdunin central leh state/UT Drug Control Authority hman tura a buatsaih a ni.
8 Damdawi, cosmetics leh medical device hi Drugs & Cosmetics Act 1940 leh Rules 1945 hnuaia licence nei thlapa siam emaw zawrh emaw theih an ni a. Technology hmasawn zel karah India ram puma damdawi licence pekna leh enkawlna chu system pakhat hnuaia felfai leh inangtlang taka kalpui a nih theihnan ONDLS hi duanchhuah a ni.
8 ONDLS hi CDSCO Ministry of HFW chuan state tinte hmang turin a ti a. State thenkhat online system dang hmang pawh ONDLS-a inchhung khawm turin a ti. Mizoram FDA pawhin ONDLS hman tumin 2026 May 22 khan notification a chhuah a ni.ONDLS hnuaia kalpui tur service chu – drugs manufacturing license, cosmetics manufacturing license, retail license, wholesale license, Blood Centre license, WHO GMP Certificate of Pharmaceutical Product an ni.
8 FDA Integrated Reporting & Monitoring System (FIRMS) a thil pahnih awm zinga pakhat chu, FDA officer-ten monthly report an pekna tur a ni a; pakhat dang chu, damdawi ruihtheih khuahkhirh ngai zual lakluh leh hralh vilzuina tur a ni. Damdawi zingah ruihna atan hmansual theih chu doctor chawh chauha hralh tur an nih laiin, doctor chawh loha hralh a tam hle a. Heng damdawi hi lakluh khap ngawt a rem si loh avangin, hmansualna tur ven leh vilzuina atan tih a ni.
Ruihtheih damdawi dan loa pek vangin drug license 12 cancel sak
