Naupang hnena rulhut hlo pek beihpui thlak thinah kumin August hian pek leh tur a ni a. Lunglei leh Hnahthial district bikah kum 1 atanga kum 19 inkar pek tum mi 60532 an awm.
Lunglei District Level Co-ordination Committee for National Deworming Day chu an chairman, district bawrhsap R Lalthazuala hoin Thawhtanni khan an thukhawm a. National Deworming Day (NDD) August Round 2024 kalpui dan tur an sawi ho.
NDD 2024 August Round bul tanna leh hawnna hi August 9 hian neih tum a ni a. Hemi ni hian Lunglei district leh Hnahthial district-a school, college leh anganwadi centre-ah rulhut hlo pek a nih dawn bakah sikul kal lote chu ASHA-ten an inah kalchilhin an pe ang. Target zinga tel si, hemi nia pek hman loh tan August 16-ah Mop Up buatsaih a ni leh dawn a ni.
NDD February 2024 round-ah Lunglei leh Hnahthial district-a rulhut hlo pek tura tuk mi 58462 atangin 57761 pek an ni a; hei hi za zelah 98.80 a ni. Kumin NDD August round-a rulhut hlo pek tum hi Lunglei leh Hnahthial district-ah mi 60532 an ni.
National Deworming Day hi kumtin vawi hnih, February leh August ah hman thin a ni a. Kumin NDD August Round hi August 9 atanga hman tan tura ruahman a ni. Naupang kum 1 atanga kum 19 inkar chu rulhut hlo (Tab. Albendazole) eitir vek tur a ni a. Naupang kum 2 hnuailam chu mum chanvea eitir thin niin, kum 2 chunglam chu mum khat pek thin an ni.
Rulhut hlo pek tur sing 6 chuang
