Hnathawh an endiknaah a thawktu ruling mi an nihna chhuang an lo awm a nih pawhin hlau lo turin chief minister Lalduhoma chuan Project Monitoring Committee member-te a chah.
Nilainia Mizoram State Project Monitoring Committee (MSPMC) Annual Report 2024- 2025 a tlangzarhnaah chief minister chuan, mipui aiawh zo tura din, member tam tak nei vek pawl hrang hrang hruaituten thukhat vuaa kan rama hmasawnna hnathawh an endikho hrim hrim chu a ropui tih sawiin, rawtna tha tak tak an neih tawh rinchhanin kal dan tha zawk an kalpui tih a sawi a ni.
“Kan ram tan hna tha in thawk mek a, in thawh tawh chin pawh a tha tawk hle. Tumah hlau suh u. Ruling mi leh sa nih chhuang an lo awm a nih pawhin hlau suh u, in lamah kan tang zel ang,” a ti. Annual report hmasaber an zo a, tun atang chuan an sawrkar hnua an hmalakna lam an en tan thei tawh dawn tih sawiin, a tir atanga an vilpui hna chu a tha tawh hle turah an ngai tih a sawi.
MSPMC project endik hu work profile format siama Planning department atanga an lakkhawm a ni a. Project an lakkhawm atang hian mipui nek na leh bihchian ngai zual nia an hriat zirchiangin a hmunah an kalchilh a, an hnathawh dan, thawh tawh chin, hna that leh that loh, hmanraw hman, expenditure leh harsatna an tawh an en a. A hmuna hna en hma leh en zawh hnuah project neitu nodal depatment, executing agency leh contractor-te an kawm thin bawk.
2024- 2025 sawrkar kum chhungin Mizorama project 47 an tlawh zinga 42 chu Annual Report-ah hian dah a ni a. Project kal lai ni tawh lo, hman tangkai loha dah tawl tak leh uiawm tak tak – Mizoram Polytechnic building district 5 – Champhai, Kolasib, Mamit, Lawngtlai leh Siaha ami an tlawhna pawh dah tel a ni.
Ruling mi leh sa hlau lo turin State Project Monitoring Committee chah
