Daily Newspaper

RULING NGE ‘LING LO?

35
R.Lalfakawma, Seling

Upat lamah chuan, ‘kan ti nek nek a, kan thleng leh mai ang’ tih ni tawh lovin thil reng reng hi a lo thleng zung zung mai hian a hriat tawh a. VC Term kum 5 tih an nih te khan kan huphurh a, mi tha lo deuh kan thlan fuh phei chuan min sawp chhe viau hman ang kan ti a; mahse hei kan thleng leh dawn ta der mai chu a nih hi. Mahni tling leh fel intihna zawn atang chuan kum 5 chhunga roreltu tha lovin min sawp chhiat theih dan tur sawite a nuam viau ang a; mahni tlin lohna zawn hmu thiamte tan erawh ‘theih tawp ka chhuah ang’ tih bak sawi nuam a ni lo vang chu.

Inthlan dawn apianga kan hmuh thin social media hmanga khawtlang hmangaihtu, khawtlang tana ttahnem ngai; mi tihsual leh tlin tawk lohnate mei nei taka sawi thiam; an awmna party ten candidate atan an vawrh chhuah mang si loh ang chi kha an mawm leh ta tuam tuam mai a. Anni ang thu hi ruah phingphisiau tlak laia mawi taka chhimbal zam ang deuh hi a ni a, chaw tak khuka khukpui mai pawh thil awl a ni. Mahse, chhimbal ang bawka inthlan zawh ruala hmuh tur awm leh thin si lo an nih avangin an lakah beisei tihsan viau chi niin a lang lo.

Khawtlang tana thahnemngai ber nia lang pawl thenkhat lahin ‘intiamkamna’ neihpui phet kan lo tum a, rorel tura kan thlante rorelsak tumin bul kan tan tihna a ni a, a fuh lovin a zahthlak zawk hle a ni. MLA inthlan dawn khan bial pakhatah phei chuan eng emaw atan MLA fund tam tham tak an ngiat a; an khaw thenawmte chan tur reng reng an ngaihtuahpui lo tihna a ni. An khawthlir a zimin roreltu dinhmunah ding lek phei se chu an khawtlang/veng kil khat te a thang hluai ang a, a dang a zuih tut ang chu.

Kan Candidate-te hi mi fel ber, mi tling ber an ni dawn lo va; sangha anga kan let kual kan let kual a nih phei chuan nam lai an nei vek ang. Tin, candidate an nih avanga han fing thar thut tur emaw, han fel thar ta viau tur pawh an ni chuang lo va; khawtlang tan theihtawp an chhuah thei ang em tih hi a pawimawh ber a ni. An nitin nun dan leh an mizia en ila, chuta tanga kan duh ber, tha kan tih ber thlan kha a fuh mai awm e.

VC inthlanah pawh party system-a kal kan nih miau avangin engkima ruahmanna siamtu tur chu party hruaitute an ni. Candidate atan party mi hlun, party tana tangkai thlan a tul rualin mipui lam ten a mihring mihrinna zawnah an lo buk ve lo thei lo va. Party hruaitu tan pawh ‘ka senior tawh’ tih mai mai kha tlinna kawng a ni dawn lo; mi tha leh dik, vua leh vang ngah thlengin kawngro a su dawn a ni. Chutih rualin mi tha na na na chu chhungkhat laina hnai nei lo pawh ni se a nunah khawtlang hmangaihna mi’n an hmuhsak phawt chuan a tawk si.

“Ruling nge nge” tih leh “Ruling nih kher a ngai lo, central atanga lo kal vek” tihte pawh kan hre chho leh ta viau; mahse, VC te hi sawrkhar hmalakna tihlawhtlingtu (Implementing agency) an nih avangin state sawrkhara roreltute nen inhnik hnaih chu awmze nei tak tur a ni. Zep lovah chuan tuna opposition-te pawh hian rorelna an chelh hunah chuan “Ruling nge nge” tih hi an au hla bawk tur a ni. Chutih rualin ruling VC pawh nise an hawihhawi loh viau chuan ram ropui min thlen chuang lo vang. Fiamthua an sawi ang deuhin, thup mawitu pute nei an ni a, an tal na viau zawk thei tho a ni.

Thuneitu ten hmeichhe seat an hauhsak danah hian siam rem chakawm tak pakhat a awm a. VC/LC Member 7 neihna hmunah Village Council lamah chuan hmeichhe tan Seat 2 hauhsak an ni a; Local council lamah erawh seat 1 chauh a ni thung. Khawpui chhungah chuan hmeichhe lehkha thiam leh officer pension fel tak tak, hmeithai hausa leh tlawngawl fel tak tak, sumdawng lian, inchhung sekrek khawih ngai miah lova awmpuite tha ring thei an tam a. Anni lamah hian hmeichhe pakhat lek han ruahmansak chu hmeichhe zinga hmantlakte an indaih lo viau zawk ang.

Thingtlang lamah thung chuan hmeichhe seat 1 lek chuh tur pawh hi inkar chhuah chawp ngial ngai a ni; chhungkhat nu ber, indaih lo em em mai kha danin a phut miau avangin khawtlang rorelnaah kan pawt lut chawp a, anmahni pawh an inthlahrung thin khawp mai. Chutih mek laiin VC member 7 awmna hmunah hmeichhe fel pahnih kan han zawng dawn ta chu a ni a, party tam tak tan chuan phuahchawp ve fe a ngai ang chu.

VC/LC pawimawhzia leh hna ngahzia ngaihtuah chuan an lawmman mawlh hi ngaihtuah nawn a tul. A thei pa ten an hamthatna leh hlawh pun chungchangah lungrual taka ‘Amen’ an pek dual dual laiin an kut ke berte erawh an bet tlawk tlawk thung si a. Tuk pumin, ni lengin, zan khaw tairek thlengin khawtlang tan an thawk a, VCP in Rs 1500, member ten Rs 800/- emaw lek a nia; thil tihkhawm nikhua hian an thlakhat hlawh hi an thawh awk awk zel mai a ni.

‘Sebawngpain buh a chil laiin a hmui phuar suh ang che’ tih thute pawh bible-ah kan hmu a, an lawmman he ti zat lek hian engtin nge rinawm takin khawtlang tan an thawh reng theih ang? Dik tak chuan Ni 100 inhlawhna chhehrelh te, tuikhur leh step siam vel atanga an lawmman tur cement lo pawh hek hlek hlekte hi an ei bel ber a ni mai a, vanram kai tura rin har deuh mai an nia.

Rs 1000 bawr vel lek hlawh hian tu nge full time-a khawtlang hmangaih a hna thawhsak thei ang? Khawtlang tana mi tha kan duh avangin kohhran mi leh NGO lama challang deuh te kan han thlang ve tak na a, hremhmun kawngah kan hruai liam zel a ni ber lawm ni. Dik takin thawk se an nupui fanaute mawngah ek chhuak tur a awm nang; hlemhle nghal lo thei lovin hlawh kan siamsak a, khawtlang hmasawnna hnathawhin a tuar zawm zel a nih hi.

Hetiang a ni chung chung hian mi tha leh dik nia kan hriat kan sawm chhuah ten VC/LC member nih an inchuh dawn a ni a, a tlak tlak vanduai kan tih ang deuhin a tling tling chu rei lo teah Ni 100 inhlawhna hmang tha lo, cut tam, thil siam tha lo kan tih leh turte an ni a, an lainatawm lawk ngawt mai. VC/LC atan an rawn pen chhuah chhan an rilru chhung kan hmuhsak thei lo te hi a lawmawm zawk viau mai thei a nia.

Engpawh chu lo ni se, Village/Local Council inthlanah hian party tin te thapui thawha an tan a ngai hle mai. Tuna kan thlan turte hi 2023 MLA inthlan atana party kut ke ber turte an la ni dawn a, chuvangin ruling party emaw, opposition party emaw tan pawh MLA thlan tluka tan tho tho a ngai. VC/LC ngah ber tan chuan MLA inthlan hmachhawn hunah hmalak a la awlsam phah dawn a ni.

THE AIZAWL POST
~Article~

HOME>> The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy