Daily Newspaper

Russia Covid-19 vaccine siam Sputnik V a him : RDIF CEO

9

Russian president Vladimir Putin-a’n Russia-in khawvela Covid-19 pandemic vaccine hmasa ber a siam chhuah thu a sawi hnuah Russian health ministry chuan vaccine chu rei lo te hnuah tam tham taka siam chhuah a nih tur thu a sawi a.

“Russian vaccine hi India leh ram dangte pawhin an neih theih nan hma kan la ang,” tiin a sawi bawk.

Kirill Dmitriev chuan Made in India, Prime Minister Narendra Modi kalpui chuan local pharma industry tihchangtlunna a kalpui thu sawiin Russia leh ram dangte pawhin India chu vaccine production hub-ah an ngaih thu a sawi a ni.

Russian Direct Investment Fund CEO he vaccine Sputnik-V siamtu chuan enchinna an neihah vaccine chu ‘a him’ thu a sawi.

Ram tam takin vaccine chu a him loh an hlauh thu an sawi laiin RDIF CEO Kirill Dmitriev chuan a nu leh pa te ngei pawh he vaccine hi pek an nih thu leh side-effects engmah a awm loh thu a sawi a.

Indian company te nena vaccine siam chungchangah thawhho chungchang a sawi lo nachungin Russian vaccine chu Indians te tana an pek tur thu a sawi thung.

Kirill Dmitriev chuan Russia chuan hma taka a siam theihna chhan chu MERS vaccine a lo siam lawksa tawh vang a nih thu a sawi a. Covid-19 hi MERS nen inang tak 80% vela inang an ni a, hei vang hian fimkhur takin chet kan la a ni, tiin a sawi.

Russian vaccine chu human adenoviral-vector platform behchhana siam niin inactivated adenoviruses chu S-protein atanga genetic material petu berah a tang a, hei hi mihring cell-a immune reponse siamtirtu ber a ni, tiin a sawi.

Clinical trial neihnaah volunteer 100% te chuan ni 21 chungin immunity an neih thu a sawi bawk a. Vaccine pek nawn leh a nih hnuah immunity response chu nasa zawka pungin hun rei tak immunity a siam ta a ni. Volunteer tin te hi an hriselna a tha a, side-effect engmah hmuh a ni lo. Clinical trial neih a nih hnuah Covid-19 kai pakhatmah an awm zui lo tiin a sawi bawk.

He vaccine hian Russian Ministry of Health hnen atangin registration certificate August 11 khan a hmu a, ram tam takin he vaccine hi neih duhin min thawhpui an tum mek a ni tiin a sawi bawk a.

Vaccine thatna hi volunteer te thisena antibody high precision test hmanga finfiah niin hei bakah hian coronavirus S protein laka immune cell te chetlak nghalna finfiah a ni bawk tiin a sawi bawk.

Kirill Dmitriev chuan Sputnik V hi khawvela Covid-19 vaccine hmasa ber niin coronavirus lakah mipuite himna a pek dawn piahah pandemic avanga khawvel economy tlachhe nasa lutuk tundinna kawngah pawimawh tawp khawk tur a ni tiin a sawi bawk a.

Vaccine chu peihfel vek ni tawhin ram tin tena an hman theih tura tam tham taka siam an tum thu a sawi a. Vaccine chuan sie effecrt a nei lo tiin a sawi bawk.

Covid-19 len tirhah Russian researchers te chuan spike-coding gene chu novel coronavirus atanga lachhuakin adenovirus vector-ah human cell a dah luh theih turin an siam a. Hei mai bakah hian adenoviral vectors pahnih (Ad5 leh Ad26) te chu vaccine that zual theih nan hian an hmang bawk a. Vaccine hian taksa chu bumin vawi khat lak pawhin immunity thenkhat a pe thei nghal a ni tiin a sawi.

India leh Russia te hi sector hrang hranga inzawmna thuk tak nei niin Russian Direct Investment Fund hian kum 2012 atangin Indian company leh organisation te nen thawhhona an nei tawh a, hengte hi ram pahnih tena inzawmna ngelnghet zawk an neih theih nana hmalakna kalzel a ni.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy