Site icon The Aizawl Post

Russia energy supply-ah Germany him tawh

Germany chuan energy supply lamah Russia-ah an inghah tak loh thu German finance minister chuan a sawi.

Christian Lindner chuan Germany chuan nikuma Russia-in Ukraine a run atangin a energy infrastructure chu a siam danglam vek tawh tiin a sawi a.
Russia-in Ukraine a run hnuah Europe-a gas pek a tawp a, kumin thlasikah buaina nasa tak kan tawh hlauhna lian tak a thleng nghal hial a. Mahse, energy dang lakna kan nei thei a ni tiin Lindner chuan a sawi a.

“Germany hi energy import ngai ngei ngei a la ni chungin mahse global market-ah Russia atangin chawk luh a nei ta lo,” tiin a sawi.

A hma chuan Germany hian Russia atangin a mamawh gas zahve lawih a chawlut thin a ni.

Nikum August thla khan Russia chuan a gas pek thin a titawp a, kumin kumtir atangin Germany chuan Russian oil a chawk luh a titawp ve bawk.

Energy a mamawh phuhruk nan coal-fired power plant te a tinung leh a, a nuclear power plant pathum tihtawp a tum pawh a thulh rih bawk a, Norway leh US te atanga natural gas a chawk luh a tipung thung.

Lindner chuan Germany chuan liquefied natural gas terminal thar thla riat chhung leka a siam zawh hman thu sawiin tam zawk siam tuma hma a lak mek thu a sawi bawk a.
Lindner chuan Germany chuan chanchin lawmawm a neih thu sawi bawkin nikum khan inflation pawh in a vanglai tawngin a hniam tak tial tial thu sawiin, “Global economy leh European economy te pawh chak zawkin a insiamtha mek a ni,” tiin a sawi bawk.

Mahse green subsidies chungchanga EU leh US ngaihdan inhmu lo chuan harsatna a thlen thei a ti thung a. Nikum khan US chuan climate-friednly technology te tan $370 billion investment a siam a. Hetah hian electric car te ang tan tax credit pek te a tel a, mahse America a siamchhuah ngei a ni tur a ti thung a. ‘made in American’ rules hian Europe lamah harsatna a siam thung a ni.
French president Emmanuel macron pawhin thla kaltaa US a tlawhnaah US rules siam thar chu a buluk lutuk tiin a sawi a. Lindner pawhin European Union chuan heng rules te avanga US nena trade war awm se an duh lo tiin a sawi.

Exit mobile version