Russian officials te chuan Ukraine chu Russian region paruk lai drone hmanga beiah puhin thla 18 kaltaa Moscow-in Ukraine a sipai a tirhluh hnua Russian leilungin beih a tawh nasat ber a ni tiin sawi a ni.
Drones te hian western pskov region a airport te chu beiin chuvang chuan kangmei nasa tak a chhuak zui niin local Governor leh media report chuan a tarlang a. Russian Defense Ministry chuan drone tam tak Oryol, Bryansk, Ryazan, Kaluga leh Moscow region hnaihah te kahthlak a ni a ti bawk.
Pskov beihnaah hian airport chu fuhin transport aircraft Il-78 pali ngawt a tichhia tiin Russia state news agency Tass chuan a tarlang.
Pskov regional Governor Mikhail Vedernikov chuan Pskov airport lut leh chhuak flight tin tihtawp vek a nih thu a sawi zui nghal bawk.
Social media hrang hranga thlalak leh video tihchhuahah Pskov khawpui chu meikhuin khuhin kangmei nasa tak a lang bawk a. Vedernikov chuan nunna chan leh hliam an awm lo tia sawiin kangmei pawh thelh zui nghal a nih thu a sawi bawk.
Pskov bakah hian bryansk region ah drone pathum kahthlak a ni tiin Russian military te chuan an sawi bawk a, Oryol region-ah pawh pahnih kahthlakin a awm tiin Governor Andrei Klychkov chuan a sawi bawk a. Ryazan region leh Kaluga region ah bakah Moscow region-ah pakhat theuh kahthlak a ni tiin official te chuan an sawi bawk.
Russia-in drone hmanga beih niin insawi
