Russia-in India-ah Su-57 a siam theih em tih thlithlai mek

Russia-in India-ah Su-57 a siam theih em tih thlithlai mek
Russian defence agency-te chuan India-a Su-57 fifth-generation indo thlawhna siam turin sum ang nge ngai ang tih ngaihtuahin anmahni chhungah ngaihtuahna an seng mek nia sawi a ni,
India-a defence thuneitute chuan New Delhi-in fifth-generation indo thlawhna awmna squadron thum tal neih a duh a, Russia-a Su-57 leh American F-35 chu hemi atana rinkai ber a ni mek tih an sawi.
Tun lai khawvela a thenawm hnai leh khawvel puma chona lian tak tak awm mekah New Delhi hian van sang lama a invenna hmanrua tihchangkana thuam chak tumin ngaihtuahna a seng hle niin an sawi.
Sorkar hnuaia mi, Nashik-a an hmunpuia Su-30MKI remkhawm hna thawk mektu, Hindustan Aeronautics Limited (HAL) chu tual chhunga Su-57 thlawhna siam thei tura rinkai ber a ni mek bawk.
Su-57 indo thlawhna siam tur hian a hmuhma pawh tihdanglam deuh a ngai dawn a, hei hi sum leh hun heh loh zawkna tur nia ngaih a ni.
India-ah siam a nih dawn tak tak chuan Indian ralthuam siamtu dang, Russian siam chhuah hmanrua lo khawih ve tawh dangte pawh hman theih an awm rinna a awm bawk.
Russia hian India hnenah hian van sanga indonaah nakin zelah Su-57 hi a la mamawh ngei dawn niin a nawr a, leisak leh a ram chhunga siam ve dan a dap reng a ni.
India hian a hmain Russia nen hian Fifth Generation Fighter Aircraft (FGFA) programme an lo kalpui tawh a; mahse, kum 10 dawn kaltaah khan a inhnukdawk a, a man, technology inpek tawnna, thlawhna thiltihtheih chinah a duhkhawp a nih loh vang nia sawi a ni.
Tun hnaiah erawh khawvel ram hrang hrangte inpawh dante thlir chungin indo thlawhna changkang siam tura thawhho leh hi a hnial lutuk tawh lo nia sawi a awm.
India-in Moscow nena indo thlawhna siam tura rilru a put thar lehna hi ram venhimna kawnga India–Russia inkungkaihna tha leh ta vang a ni bawk a. New Delhi leh Moscow hi vawi tam tak S-400 air defence system leh S-500 air defence changkang zawk chungchangah an lo indawr tawh a ni.
India hi venhimna kawnga US nena an inkar a chhiat tak deuh avangin Russia lam hi a hawi phah deuh bawk a. Tar lan tawh thin angin Washington hian Indian bungrua a lak luhah tariff 50-a sang a la a, hei hi New Delhi chuan a lawm lo hle a, an inkar pawh a khik hret phah.
US hian India hnenah hian a F-35 stealth fighter lei turin a nawr reng bawk.
Thuneitute chuan Russian-ten India-a inbun tur a ni em tih an zir chianna hian India-a Su-57 siam chhuak tura sum leh industry mamawh a nih dante an en deuh bik tih an sawi a. Thutlukna chu a hlawk dawn em, a man chungchang leh Moscow-in technology a pek phal danah a innghat dawn niin an sawi bawk.