Russia-in Ukraine-a drone a thlawhtir tam ber ni thleng

Russia-in Ukraine-a drone a thlawhtir tam ber ni thleng
Ukraine chuan Russia-in thapuia a rûn hnua drone hmanga a beih nasat ber tum a tawng niin a sawi a, Kyiv telin region thahnem tak a bei a, hmeichhe pakhat a thi niin a sawi.
Russia hian Pathianni zing dar 08:00 (India-a chawhma dar 10:30) vel atang khan drone 273 hmanga kapin Kyiv region laili bakah khawchhak lama Dnipropetrovsk leh Donetsk region pawh a bei niin Ukrainian air force chuan a sawi.
Beihna hi Donald Trump leh Russian President Vladimir Putin inbiak tur ni tuk a nih tukah chiah a ni a. US President hian inkahhai a awm ngei theih nan a nawr.
Russian leh Ukraine hi Zirtawpni khan kum thum chuang hnua a vawi khat nan hmaichhanah indawrin Turkey-ah an inbia a; mahse, indo tihtawpna lam sawi thleng lovin mi tang inthleng tur erawhin an inrem.
German Chancellor Friedrich Merz chuan Pathianni khan amah leh Britain, France leh Poland hruaitute chuan Trump-a’n Thawhtanni tuka Putin-a a biak hmain an kawm hmasa dawn tih a sawi.
Pathianni khan Ukraine-a air force chuan Russia-in drone a hman tam ber ni a nih thu a sawi a, heng zingah hian Shahed attack drone-te pawh a tel niin an sawi a. Drone 88 chu an lo kap thla a, 128 chu ‘engmah pawi khawih lovin’ meivapah a chang niin an sawi bawk.
Kyiv daiah hmeichhe pakhatin a thih phah thung niin an sawi a, mi dang pathumin hliam an tuar bawk tih an sawi.
Russia-in tam tham taka drone-a a beih hnuhnung ber chu a rûn kum thumna champha, February 23 khan niin Moscow hian drone 267 zet a lo thlawh luhtir tawh.
Ukraine thuneitute chuan Inrinni zan khan Russia chet lak dan enin ram hrang hrangten inkahhai kalpui turin nawr nasa hle mah se indo tawptir a tum lo niin an sawi.
“Russia tan chuan Zirtawpnia Istanbul-a indawrna kha tih ve mai mai a ni. Putin-a hian indo a duh,” tiin Ukrainian president thawhpui hnai ber, Andriy Yermak-a’n a sawi.
Pathianni khan Volodymyr Zelensky-a chu Vatican-ah kalin Pope Leo-a’n pontiff thar a nih hnua mass hmasa a huaihawt a chhim a, an inkawm bawk a. US Vice President JD Vance nen Rome-ah rei lo te an inbe bawk.