Russia-in Ukraine-a tanpui semna hmun an beihah mi 24 thi

Russian-ten mi tanpuina semna hmun (aid distribution centre) an bomb-naah mi 24 vel an thi a, Ukraine-a an hruaitu chuan ‘a rapthlak tak zet’ tih a sawi.
Ukraine chhim lam, Zaporizhzhia region hotu, Mykhailo Semikin-a chuan Komyshuvakha khuaah hian kg 3,000-a rit bomb pakua vel thlak nia sawiin mi pangain hliam an tuar a, mi 27 chin an la hre lo bawk niin a sawi.
President Volodymyr Zelensky-a chuan a hmasa berah tual chhunga sikul pakhat, ‘mihringte mamawh thil atana hman’ a fuh phawt a, a hnuah miin awm him nana an hman hmun beih leh a ni tih a sawi.
Thawhtannia an ram beihna na tak a thlen hnua video a dah chhuahah khuar thuk leh zau tak a lang a, thil chim chhe karah chhanchhuah hna thawktute an che vel lai hmuh tur a awm.
Russian sipaite chuan beihna chungchang hi engmah sawi an la nei rih lo.
Zelensky-a hian thi hi 18 niin a sawi a; mahse, Ukraine-a state emergency service, DSNS chuan a hnuah 24 tih a sawi a, an zingah chhanchhuah hna thawktu pahnih leh police pali an tel tih a sawi bawk.
“Russian-te hian chawlhkar tina miin tanpuina thil an dawnna hmun leh an awmna hmun, Komyshuvakha-a chengte beih hi a tim reng reng lo,” tiin Ukrainian president hian social media-ah a tar lang.
“He thil hi Russia-in insuma boruak tihdaih a duh lohzia finfiahna dang a ni,” a ti bawk.
Tun hnaia Russian-Ukrainian tang dunin Russia-in an awp lai, Oleshky khawpuia civil mi tangkhangte lak chhuah hna thawh hnu khan ‘rahbi dawt leh chuan muanna a awm theih dan a tilang thei dawn a ni’ tiin a lo sawi tawh.
Thawhtannia civil mite beihna a thlen hnuah erawh, “Hetiang inthahna hian Russia hi a kawng hawi lo zawngin a kal a, Russia hian mi a la that chhunzawm zel a ni,” tiin Zelensky-a chuan a sawi.
Hetih lai hian Semikin-a chuan Russian-ten an beihna chu an khaw tan a ‘lungchhiatthlak takzet’ tih sawiin ‘in chim chhe karah mi eng emaw zat’ an la awm tih as awi bawk.
Chhanchhuah hna thawktuten hna an thawk nghal mawlh mawlh a; mahse, an bul vel chu Russian drone hmanga beih a nih fo avangin an hna an chawlhsan a ngai lehrih thin bawk.
Russian President Vladimir Putin-a chuan Ukraine hi February, 2022 atang khan a rûn tan a, inkahhai leh inremna a awm theih nan ram dangten palai hna thawk thin mah se hlawhtlinna tak tak a la awm thei lo.