Site icon The Aizawl Post

Russia-in Ukraine bei zui zel

Russia chuan Ukraine ram hmun hrang hrang missile-in a bei thar leh a, hmar lama Kharkiv khawpui atanga chhim lama Odesa thlengin leh khawthlang lama Zhytomyr thlengin a bei a ni.
Kharkiv leh Odesa-ah chuan missile hian residential building leh infrastructure te a deng hlawm, hmun tam takah power nei lovin a siam bawk.
Hetih lai hian eastern Ukraine a Bakhmut khawpuiah chu thunun zawk tuma inbeihna a nas ahle bawk a. US intelligence chief te chuan Ukraine indona chuan kum rei tak a la awh thei an ti.
Russian President Vladimir Putin an kum khat kaltaa Ukraine a run hnuah sipai leh civilian sing telin nunna an chan phah tawh a, mi sang tam takin hliam tuarin Ukrainian maktaduai khat chuang te chu refugee in an awm phah tawh a ni.
Russian missile chuan Odesa a energy facility fuhin hei vang hian power pekchhuah theihin a awm lo tiin governor Maksym Marchenko chuan a sawi a, missile hian civilian te chenna hmun thenkhat pawh a kap fuh tiin a sawi bawk.
“Missile 15 velin Kharkiv city leh region a fuh a, infrastructure facility pawimawh te a tum ber” tia sawiin regional administrative chief Oleg Synegubov chuan residential building pawh a fuh tiin a sawi bawk.
Russian missile te hian khawthlang lama Vynnytsia leh Rivne te leh centre a Dnipro leh Poltava te pawh a kap fuh bawk a ni.
US Director of National Intelligence, Avril Haines chuan President Vladimir Putin chuan Ukraine indona chu kum tam tak awh turin a pawhsei an rinthu sawiin mahse kumin chuan liantham taka chet la turin Russia chu a chak tawk lo tiin a sawi bawk a.
Ukraine indona chu inhrawt dakna a chhuak tawhin a tute ve ve mahin military advantage an nei tawh lo a ti bawk a.
“Kumin chhung hi chuan Russia sipai ten liantham taka chetla turin theihna an nei lovah kan ngai a, Putin hian fim taka thlirin indona awh rei tir chu Russia-in Ukraine-a a thiltum tihhlawhtlin nana kawng tha berah a ngai a, chumi tur chuan a kum a kum pawh a awhtir thei” tiin a sawi.
Haines chuan Russia chuan tuna Ukraine ram a awp chinte awp reng tur pawhin nasa taka a inthuam that a ngai ngei dawn tia sawi bawkin loh theih lohin sipai tam zawk leh third-pary ammunition Ukraine a awm reng turin a mamawh ngei ngei dawn a ti bawk.
Hetih lai hian Ukraine sipai te chuan Bakhmut-ah Russian beihna chu an nawr let theih tawh thu an sawi a, chutih laiin Russian forces te chuan Bakhmut khawpui zahve khawchhak lam chu an thuhnuaiah an dah tawh an ti ve thung.
Moscow hian Bakhmut hi a thlaa thla lak tumin a bei tawh a, Bakhmut lak tuma inbeihna avang hian ram pahnih chuan chan an nei nasa tawh hle a ni.
“Hmelma ten min beih chhunzawm zel a, Bakhmut lak tuma an beihna an rauhsan hauh lo” tiin Ukrainian armed forces general staff chuan a sawi a, “Kan sipaite chuan Bakhmut lak tuma beihna an danghcat thei zel a ni” tiin a sawi bawk.
Ukrainian city Bakhmut lak tuma beihnaah hian Russia chuan sipai 20,000 atanga 30,000 a chan phah tawh tia sawi a ni a, nikum summer atang khan lak tumin a la bei ta char char a ni.

Exit mobile version