Russian-ten van sang atanga Ukraine khawchhak lama khua an kahnaah mi 24 an thi a, mi dang 19-in hliam an tuar bawk niin tual chhung thuneituten an sawi.
Thite hi ‘civil mi pangngai,’ an pension lawmman dawng tura Yarova, Donetsk region-a kalkhawmte an nih thu President Volodymyr Zelensky-a chuan a sawi a. Region sorkar hotu, Vadym Filashkin-a chuan emergency services-ten a hmunah hna thawk mekin mi chengte chu ‘hmun himah insaseng turin an ngen’ tih a sawi.
Yarova hi Fonetsk region-a khawpui lian ber pakhat, Slovyansk hmar lam hret leh Russian sipaiten khawchhak lama muangchanga hma lam pan hret hreta ral an beihna hnaih tak a ni.
Thi zat hi a dik a nih chuan tun hnai chawlhkar rei vak lo chhunga Ukrainian civil mi thihna tam ber tum a ni ang.
August thla tawpah khan zan lama Ukrainian khawpui, Kyiv beihnaah mi 23 an lo thi tawh.
Kartawpah khan thla 42 an indo tawh chhunga Russia-in van sang atanga Kyiv a kah nasat ber thlengin khawpui bera sorkar hmun pawimawhte pawh an kap fuh a, Zelensky-a chuan indona tizual tura chetna ‘nunrawnthlak’ tiin a sawi.
Yarova-a thil thleng thlalak a dah chhuahah Zelensky-a chuan ‘eng thu mahin’ Russian beihna hi sawi fiah theih a ni lo tih a sawi a, Russia-a sipaite chuan engmah an la sawi lo.
A bul lawk, Lyman-a tual chhung rorel khawl hotu, Oleksandr Zhuravlyov-a chuan Ukraine-a sorkar thupuanna, Suspilne hnenah Thawhlehni chawhma dar 10:40 (India-a chhun dar 01:10) vela thleng a nih thu a sawi a. Thite hi tar, pension tawh deuh vek an ni tih a sawi.
Ukrainian Interior Minister Ihor Klymenko-a chuan a hnuah Russia hian khuaah hian ‘guided air bomb’ an thlak tih a sawi.
Thlalak darhah chuan pension lawmman sem nana an hman thin, Ukrainian postal service lirthei chhe nasa tak hmuh theih a ni.
Yarova hi Lyman leh Izium khawpui inkar rel kawng pawimawh taka awm a ni a. Russian sipaiten a dai an thlen tawhna, Novoselivka atanga km ruk awrha awm a ni bawk.
Ukraine-a state emergency service DSNS chuan Donetsk-ah tho hmun dangah a hma lawkin Russian laipui kahnaah mi dang pathum an thi niin a puang bawk.
Russia-in Ukrainian khua a beihnaah civil mi 24 thi
