Russian President Vladimir Putin chuan Moscow chuan African leader tena Ukraine buaina tihtawp a nih theih nana rawtna an siam chu ‘uluk takin’ a zir chiang mek tiin a sawi.
“In hmalakna hi kan zah a, uluk takin kan zir chiang mek a ni” tiin Putin chuan St Petersburg a Russia-Africa summit ni hnihnaah a sawi a.
“A hmaa palai hna thawh kha advanced democracies inti tena an kaihhruai a ni a. Tunah chuan Africa in an ngaih pawimawh ber pawn lama harsatna awm te sutkian a nih theih nan ke an pen a ni” tiin a sawi bawk.
Russia-Africa summit hi Russia in Black Sea kaltlanga Ukrainian grain te export theihna tura inremna ata a inhnuhdawh hnua thleng a ni a, Africa chu Ukraine grain-a innghat thuk tak a nih avangin Russia thutlukna siam hi an ngaihven hle a ni.
June thla khan African delegation hmasa ber te chuan Ukraine tlawh hmasain chumi hnuah Russia tlawh lehin palai hna an thawk tawh a.
African rawtnaah hian military de-escalation te security guarantee te bakah sovereignty mutual recognition te pawh a tel a.
Ukraine chuan African te rawtna hi hnawl nghal thungin, rawtna ang chuan Russian sipaite chuan Ukrainian leilung an chhuahsan dawn chuang lo a ti thung.
A hma pawhin Kremlin chuan African te rawtna chu ‘a taka kalpui harsa tur’ tiin a lo sawi tho tawh bawk.
Africa-ah hian Russia chuan sulhnu tam tak neiin tun hnaiah phei chuan Wagner mercenary te chu Africa-a buaina hrang hrangah inrawlhna an nei deuh vek tia sawi a ni bawk.
Russia-in zirchiang mek inti
