Russia leh Ukraine-in ruang inthleng tawn chhunzawm

Ram pahnih inkara inthleng tawnna hnuhnung berah Kyiv chuan Russia-in Ukrainian ruang 1,000 an hlan tih a puang.
Russia pawhin ruang 38 a dawng let ve bawk tih Moscow-a chief negotiator Vladimir Medinsky-a chuan a sawi.
Medinsky-a’n Telegram-a thlalak a dah chhuahah chuan biohazard suit ha eng emaw zat chu ruang phurh nana hman refrigerated truck var bulah an intlar lai a lang.
Kyiv leh Moscow hian kum li dawn an indo tawh chhungin sipai an thah ruang an inkawlsak sang tel an inthleng tawh a. Tuna inthleng an kalpui hi kum 2015-a Istanbul-a an inbiak tuma inremna an siam anga an kalpui a ni.
Inremna an siamah hian Moscow leh Kyiv hian sipai ruang 12,000 an inthleng bakah indona avanga an man hliam na zual leh damlo kum 25 hnuai lamte an inthleng dawn bawk.
November thlaa an inthleng hnuhnung ber khan Russia-in sipai ruang 1,000 a pe kir a, Ukraine hnen atangin ruang 30 a dawng ve thung.
October, 2025 hnu lamah erawh indonaa mi an inmansak tumah an inthleng tawn tawh lo thung a, an pahnih hnih hian kalpui zui duh tawh lovah an inpuh ve ve bawk.
Russia-in February, 2022 atanga thapuia a thenawm ram a rûn hian kum li a tling hnai ta hle a, indona titawpa inremna a awm theih nan hma pawh lak mek zel a ni.
Kar hmasa khan Russian, Ukrainian leh US aihawtte chu United Arab Emirates-ah indona a chhuah hnua a vawi khat nan an inbia.
Ram pathumte hian inbiakna awmze nei tak an neih thu an sawi theuh va; mahse, ram inneihsak chungchangah inremna an la nei thei lo va. Russia-in Ukraine-a Donetsk region 25%-a zau a awp mek neih a tum chu Kyiv-in a la phal thei rih lo.
Ram pahnihin inremna an neih theih nan indawrna kalpui mek reng karah an inbei chhunzawm zel bawk.
Thawhlehni pawh khan Ukraine-a Kharkiv region-ah Russian drone-in passenger phur rel a kah fuhah mi panga vel an thi.
Russia hian tun hnaiah Ukraine-a vantlang inhmantawm thilte a bei nasa a, Ukraine-a mi sang telin thlasik khaw vawt vin tak karah intihlumna tur leh power an neih loh phah nasa hle.