Daily Newspaper

Russian politician Navalny Novichok hmanga hrai

25

Russian opposition politician Alexei Navalny chu Novichock nerve agent ngeia tura hrai a ni tih hai rual a ni lo tiin Germany chuan a sawi.

Chancellor Angela Merkel chuan amah thah tuma chetlakna tuartu a nih thu sawiin Russia atanga sawifiahna leh chhanna an ngaihven tur thu a sawi.

Navalny hi thla kalta khan Siberia a thlawhna chhunga a chuan laiin a na thut a, Berlin panpui zui nghal niin nikhaw hre lovin rei tak a awm a ni.

Navalny team te chuan Russian President Vladimir Putin-a thupeka tura hrai niin an sawi a. Kremlin chuan he puhna hi a hnawl thung.

Kremlin thupuangtu chuan Germany chu an thil hmuh leh hriatte hrilh hre vek tura ngenin a finfiahna an neih te nen lama hrilhhriat a phut thu a sawi a. Kremlin thupuangtu Maria Zakharova chuan, “Khawnge thudik chu, khawnge a formula, information tlemte tal awm thei se?” tiin a sawi.

Novichok nerge agent hi Russian spy Sergei Skripal leh a fanu kum 2018-a UK-a hrai nan an lo hmng tawh a. An pahnhin an dam chhuak ve ve nachungin, British hmeichhe pakhat chuan a thih phah thung a, UK chuan Russian military intelligence te chu he thil tituah hian a puh a ni.

British Prime Minister Boris Johnson chuan Navalny tûra hrai chu nataka a dem thu sawiin, “Russian sorkar hian Navalny chunga thil thleng hi a sawifiah tur a ni a, khawvel ram dangte hnenah hrilhin thudik lailan a ni tur a ni,” tiin a tweet zui bawk.

Germany-in eng nge a sawi?
Berlin chuan military laboratory a toxicology test result a tichhuak a, Chancellor Merkel chuan ‘zawhna turu tak Russia sorkar chauhin a chhan theih leh a chhan ngei tur a awm’ tiin a sawi a.

“Tu emaw chuan Navalny thah a tum a, German sorkar pumpui aiawhin he thil hi a na thei ang berin ka dem a ni,” tiin a sawi bawk.

Merkel chuan Nato leh EU member te pawh investigation result chu an hrilh hriat nghal thu sawiin Russia chhanletna atangin hmalak zui zel dan tur an ngaihtuah tur thu a sawi. Nato Secretary-General Jens Stoltenberg chuan chhui chianna neih ngei a duh thu a sawi nghal bawk.

Navalny chunga thil thleng?
Tomsk khawpui atanga Moscow pana thlawhnaa an chuan laiin Navalny hi a na ta thut a. Amah thlawptute chuan Tomsk airport ah a thingpui inah tur dah niin an sawi.

Vladimir Putin sawiseltu langsang ber Navalny chuanna thlawhna chu Omsk-ah tumtir nghal niin ni thum chhung doctor ten an enkawl hnuah Berlin a Cherite damdawi in panpui a ni leh ta zawk a ni.

Kremlin chuan Russian doctor te chuan atropine hmangin an enkawl thu an sawi a, hei hi nerve agent effect enkawlna ber niin mahse tûra hrai a nihna an hmuh loh thu an sawi thung.

Navalny nupui chuan Russian doctor te chuan Navalny taksaa tur chambangte a ral hma loh chu Germany-a enkawl tura phurh phal lovin an tikhawtlai lui tiin a sawi thung.
Navalny hi a tha hret hret a, mahse, intensive care unit-ah ventilator hmanga la enkawl mek a ni.

Novichok?
Russian tawnga Novichok hi ‘newcomer’ tihna a ni a, kum 1970 leh 1980 chho vek a, Soviet Union in advanced nerge agent an siam thahnem tak zinga pakhat a ni.

Novichok agent hian nerve agent dang ang bawkin nerve atanga thaa message pekchhuah dangin chu chuan taksa chevel a ti tawp ta thin a ni.

Novichok agents thenkhat chu a tuia siam a ni a, a then chu a dipa siam niin powder ang mai niin awlsam tea thehdarh mai theih a ni bawk.

Novichok hi siam a nih danah chuan chemical weapon te aia tûr pai hnem zawka siam tum a nih avangin second 30 atanga minute hnih lek inkara thawk nghal hman a ni bawk.

Tu nge Navalny?
Navalny hi Russia a anti-corruption campaigner niin Russian thuneitute duhlohna ram pum huapa kalpui tawhtu a ni. Putin-a party te chu ‘bum hmang leh misual rual’ tia sawiin ‘Russian thisen hiptute’ ti hialin a sawi bawk.

Russian thuneitu ten sum tichengpena puhin inthlanah Putin khing thei lova siam zui a ni a. Thubuai an siamsak chhan hi Kremlin-in a sawiselna an duh loh vang niin a sawi thung.

Russia-ah President Valdimir Putin sawiseltu langsar ber ber te chuan beih an tawk fo tawh a, nunna chan an awm nual bawk. Chung zingah chuan politician, intelligence officer leh journalist te pawh an tel a, tûra hrai te an tawk hlawm. Mahse, hengah hian Kremlin chuan inhnam hnawihna a neih loh thuin a tlip ziah thung.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy