Pathianni zan Barcelona Open final-ah Casper Ruud chuan straight set-a Stefanos Tsitsipas hnehin a career-a title lian ber a hlawhchhuak.
Norwegian third seed Ruud hian Greek fifth seed lakah 7-5 6-3 hnehna changin, kum 25 mi kuta ATP 500-ranked event title a luh vawikhatna a ni.
World number six Ruud hian Grand Slam final vawithum ngawt khel tawh mah se a la tlawm ziah a, a career-ah tennis tournament level sang 500 leh 1000 inelna chinah champion a la ni ve thei tlat lo a, a hma chiah Monte Carlo Open final-a a ngam loh Tsitsipas laka phuba la chungin a career-a mellung pawimawh a phun ve ta a ni.
He hnehna hi Casper Ruud tan claycourt tennis-a lawmman ropui ber French Open title a beiseina kawnga inrintawkna siamsaktu a nih ngei a rinawm a, kum liamta hnuhnung pahnih Roland Garros final-a Rafael Nadal leh Novak Djokovic a hneh loh hnuah kumin hi clay lallukhum a khum hun a ni ve thei tawh dawn em kan thlir ang.
Pathianni zan vek khan Germany player Jan-Lennard Struff pawhin straight set hmang bawkin American Taylor Fritz a hneh a, Munich khawpuiah BMW Open title a hlawhchhuak.
Fourth seed leh home favourite ni bawk Struff hian third seed Fritz lakah 7-5 6-3 hnehna changin a career-a a vawikhatna atan clay-court ATP 250 event-ah ATP Tour title a sualchhuak ve bawk.
Bucharest Open lamah Hungary player Marton Fucsovics pawhin 6-4 7-5-a Mariano Navone of Argentina hnehin a ATP Tour title pahnihna a lawm ve bawk.
Ruud kutah Barcelona title
