Daily Newspaper

RV case vangin 400+ test tawh Petrol pump case-in kangkai zau

17

Aizawl, August 24 :  Rangvamual bulhnaia Covid kai hmuhchhuah leh hemi hnua Rv-a kal hri kai hmuhchhuah chuan nghawng a nei thui a, mi 400 chuang sample lak a ni tawh. Aizawla petrol pump-a thawk hri kai hmuhchhuah pawhin a kangkai zai viau niin a lang a, Kolasib district chhung hmun thenkhat leh Sakawrdai thleng chhuiluh a ni.

Darlawn, Sawleng, Rangvamual leh Zangena Petrol Pump-a Covid kai hmuhchhuahte atangin Mizoram police leh Health department chuan an kaichhawn theih chhui hna an thawk a. Thudawn danin, thenkhatah chhuizuina fumfe neih a har chungin theihtawp chhuahin an kaina ni awmte an chhui zel tih sawi a ni.

Rangvamual positive case chungchangah mi 400 chuang test an ni a, result chhuak tawhah atam ber chu a negative. Nimin thleng khan Darlawnah mi 64 leh Sawlengah mi 113 swab sample lak tawh niin, vawiin lamah Darlawnah 37 leh Sawlengah 96 te sample lak leh tura ruahman a ni. Zangena petrol pump positive case contact-te pawh chhui zui mek zel a ni.

Rangvamualah hian helai vela lo chetla thin pakhat Covid positive hmuhchhuah a nih avangin amah atanga kai thei nia hriat leh heng mite atanga kai thei nia hriatte chu endik an ni a. Hemi avang hian veng engemawzatah Rangvamual kalte chu in report tura tih an nih bakah veng engemawzatah chuan khunghran an ni. An vaia test neih vek a hautak tham avangin khunghran zing atangin sample hi lak kual nia thu dawn a ni.

Hetianga test atang hian mi pakhat, Rangvamual kal zing ami chu Covid a kai tih hmuhchuah a ni ta a. Midang endik chinah erawh Pathianni thleng khan hmuhchhuah thar a awm lo. Rangvamual kal zinga hri kai hmuhchhuah hi an veng task force hruaitute sawi danin, contact tracing tih zui zelnaah Rangvamual atanga kai a ni ngei em tih a chiang chuang lo tih an sawi. An veng atang hian RV-a kal mi 70 swab sample lak zingah amah chiah hian a kai tih an sawi a, RV loah pawh hian hmun dang dangah a kal avangin khawi ber atanga kai nge tih hriat a ni lo. A chenpuite leh an chenna bulhnai in 20 vel chu midang tlawhpawh theih loha siam rih a ni tih an sawi bawk.

Zangena petrol pump-a thawk, hri kai hmuhchhuah atanga kai ve leh chhawng nia ngaihte an hriat theih chin chu, Kolasib district-a Meidum-a awm mek te, Bukpui leh Saiphaia awm mekte an ni a; an ni hian hri an kai tih hmuhchhuah ve an nih hma hian hmun hrang hrang an lo tlawhkual nasa hman a, Kolasib district-a positive hmuhchhuahna te awmna bakah Bairabi North ten total lockdown an puang mek a, primary contact te result azirin swab sample lak leh turte pawh ruahman lawk a ni.

Pathianni chawhnu khan ZMC RT-PCR laboratory-a emergency sample test 6 zinga positive pakhat, Sakawrdai quarantine facility-a awm mek chu Zangena petrol pump contact tracing atanga hmuhchhuah a ni bawk. Nimina emergency sample test result zingah Tuikual North 2, Kolasib 1, Cachar 1 leh Sakawrdai 1 an negative thung tih Health department chuan an sawi.

August 22 zana result chhuak zinga hri kai hmuh thar hmeichhe pahnih Sethawn Kolasib district amite chu positive contact atanga kai nia sawi an ni bawk.

Lunglei bul Pukpui dai, khualzinte tawngtaina bula hnamdang mi hotel siam nghaktu hnamdang chu hri a kai tih hmuhchhuah a ni bawk a. Inrinni zan atang khan district magistrate ruahmanin inkharkhip puan nghal a ni. Hemi hmalam hian Siaha-a kal tur hnamdang pahnih chu he hotel-ah hian an chawl a, pakhat zawk hian Covid-19 a lo kai tawh tih hriat a ni. An hnimhnaihte hi chhui nghal niin, Pukpui khawchhung atangin mi 20 vel endik ngai hriat a nih tawh bakah Lunglei chhung veng pathumah chhuizawm ngai an awm dawn tih thu dawn a ni. Lunglei bul Mausenah pawh he hotel-a chawl an awm avangin Pathianni atang khan an inkharkhip nghal tih thu dawn a ni.

Lungleia Health department hotute chuan, he hotel-a chawl August 9-22 chhung amite chu anmahni veng task force theuhah in-report turin an ngen a ni.

Hetihlai hian Vairengte screening point-a medical duty zinga pakhat chu Covid a kai tih hriatchhuah a ni a, a taksaa hri kai lanna nei rih lo a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy