FabullaFilms leh Paperdoll Productions chuan Mizo filmstar hriat hlawh zing ami Rynzuala leh Vanneitluanga te thawnthu ziah atanga film an siam “Trap Between Realms” chu tihchhuah tumin hma an la mek a, he film trailer hi youtube lamah en theihin a awm tawh.
He film-ah hian amah Rynzuala hi a chang nghal a, mipa naupang dinchhuah tuma harsatna hrang hrang tawk Rinfela angin a chang dawn. He film hi Mizo film chhuak tawhte nena khaikhinin a kalphung a danglam dawn a, ngaihtuahna fim senga en ngai chi a ni. Rinfela hian lehkhabu danglam tak a hmuhchhuah atanga a mumang khawvel atanga talchhuak tura a beihna vel chu a laimu a ni.
Trap Between Realms film changtute hian Elite Gym-ah Isaac Lalchhuanmawia (National Muaythai gold medalist / fight choreographer) hnuaiah basic mix martial arts coaching leh fight choreography chu thla hnih ngawt an kal a, a changtunu Angaihi (Lalhruaitluangi) phei hi chuan mix martial arts coaching a kal chhunzawm zel phah nghe nghe.
A film hi dark fantasy lam chi, action, coming of age leh psychological thriller inpawlh kan tih ang kha a ni tih a siamtute chuan an sawi a. ‘Trap Between Realms’ ah hian khawvel pahnih (alternate realities) ang kha kan hmu dawn. He khawvel chhungah hian eng ang mi nge kan hmuh turte chu a film trailer leh teaser ah a hmuh theih phawt dawn a ni.
Rynzuala film thar a hnai Trailer an tichhuak tawh
