November 15 zan dar 10.00 vel khan R Vanlalkhuma (35) Hnahthial Electric Veng chu Tuichang kamah a ram vah laiin ramvak ve dang Remruatliana (31) Hnahthial Electric Veng tho chuan sa emaw tiin a kap palh a, a hliam tuar loin a thi.
Hnahthiala Kailawn chanchinbu editor Lalliansanga hnen atanga thudawn danin, vanduaina tawk R Vanlalkhuma hi a thianpa nen Tuichang kam Nawlzawlah sazaw an veh a, kap palhtu Remruatliana pawh hi a thianpa nen tho Tuichangah hian kalin Thlengpui rekah lenkhang an zar a, nghah pahin Nawlzawl velah hian sazaw an veh ve tho niin Remruatliana ram vahpui hian a sawi a ni.
Pawikhawihtu Remruatliana hian a awmna atanga feet 60 vela hlaa R Vanlalkhuma’n sazaw a veh phei chu ram vak ve dang an awm tih a hre lo nen, sazaw emaw ti ve tho in ulhbun silai (4.8 mu) in a kap a, a lu leh a taksa hmun dangah silai mu a lut. Remruatliana hian a ram kalpui, a thlanglawka awm chu koin pawi a khawih thu hi a hrilh nghal a, an bawisawm hnu lawkah a chat zui mai nia sawi a ni.
He thil thleng hi Hnahthial Police chuan an hriat veleh tih tur tul tiin R Vanlalkhuma ruang hi District Hospital Hnahthialah postmortem niin, Ningani chawhnu khan vui a ni. Hnahthial Police Station-ah thubuai ziahluh niin kap palhtu Remruatliana hi la nghal a ni.
Sa emaw ti an inkaphlum
