Sabalenka hnungzuia 3rd round lut Gauff
2024 Australian Open semi-final aia sang Melbourne Park major tournament-a la chuangkai zo lo Coco Gauff chuan nimin khan world number one Aryna Sabalenka hnung zuiin Australian Open second round a paltlang a, minute 77 lek chhungin Serbia player Olga Danilovic lakah 6-2 6-2 hnehna a chang.
Danilovic hian first round lamah American legend zur tawh Venus Williams paltlang mai bawk mah se two-time major singles champion Gauff meuh erawh Margaret Court Arena-ah a khan lo hle.
Third seed Coco Gauff hian third-round match pakhatah a chipui Hailey Baptiste a tum leh ang.
French Open champion Gauff chak hma hian kum khat chhunga Grand Slam tournament hmasaber title tum hnih la tawh Sabalenka chuan minute 72 chhungin Chinese Bai Zhuoxuan lakah 6-3 6-1 hnehna a chang hman a, American mihang Gauff aiin minute ngain hun a hmang tlem zawk.
Belarusian Sabalenka hi kum thum chuang chhung chu top 100 pawn lam player lakah a tlawm ngai ta lo a, kuminah phei chuan chak loh la nei lo hrim hrimin, Melbourne third round-a a tum leh tur Anastasia Potapova lakah eng ti ang taka fiahna lian nge a hmachhawn dawn kan thlir leh ang.
Amah aia ranking-a 701 zeta hniam zawk Chinese world number 702 laka eng harsatna teh vak mah tawk lo top seed Sabalenka khan Grand Slam title pali la tling ve tawhin, Australian Open bikah hian a set hnuhnung khelh 50-ah set 45 a la a, Open era an tih hunah hian chutih kawngah chuan hmeichhe tennis legend rual Steffi Graf, Martina Hingis, Monica Seles leh Serena Williams-te ai pawhin a record a tha zawk!
Kum 2023 leh 2024-a Melbourne title hawntu Sabalenka hian he record hi a chhuang ve hle a, a chunga hming tarlante nena khaikhin a han ni ve hrim hrim pawh chu tunhma lama a lo suangtuah phak ngai loh a nih thu sawi chungin hmalam a pan zelna tur kawngah a record thar chu fuihphurtu pawimawh a nih thu a tarlang tel.
Nimin kha Melbourne khuaa tournament kal laiah a ni lina niin, top 10 women’s seed zawng zawng an la dam kim vek a; round thumna lut zingah Russian eighth seed Mirra Andreeva pawh telin, ani phei hi chuan minute 67 lek chhungin Greek nula hriat hlawh Maria Sakkari chu 6-0 6-4-in a nawp.
Italian seventh seed Jasmine Paolini pawhin nimin vek khan 6-2 6-3-in Poland nula Magdalena Frech a hneh ve bawk.
Sabalenka hnungzuia 3rd round lut Gauff
